नाशिक : विधिमंडळातील रमी प्रकरणामुळे कृषिमंत्रीपद गमवावे लागलेले ॲड. माणिकराव कोकाटे आता क्रीडा विभागात सक्रिय झाले आहे. रिदमिक जिम्नॅस्टिक्समध्ये भारताचे प्रतिनिधित्व करणाऱ्या संयुक्ता काळे हिची रिओ येथे होणाऱ्या वर्ल्ड चॅम्पियनशिप २०२५ साठी निवड झाली. ब्राझील देशात स्पर्धा सुरु होण्यापूर्वी क्रीडा मंत्री ॲड. माणिकराव कोकाटे यांनी संयुक्ताशी दूरध्वनीद्वारे संपर्क साधून शुभेच्छा दिल्या.
रिदमिक जिम्नॅस्टिक्स क्षेत्रात महाराष्ट्रासाठी अभिमानाची बाब ठरली आहे. ठाण्यातील संयुक्ता काळे ही आंतरराष्ट्रीय स्तरावर भारताचे प्रतिनिधित्व करण्यासाठी वर्ल्ड चॅम्पियनशिप २०२५, रिओ (ब्राझील) या स्पर्धेसाठी निवडली गेली आहे. तिच्याबरोबर भारतीय संघाच्या प्रशिक्षक म्हणून मानसी गावंडे यांचीही निवड करण्यात आली आहे.
संयुक्ता ही भारतातून या स्पर्धेसाठी निवड झालेली एकमेव रिदमिक जिम्नॅस्ट असून ती वयाच्या पाचव्या वर्षांपासून ठाणे येथील फिनिक्स जिम्नॅस्टिक्स अकादमीत सराव करत आहे. तिला आंतरराष्ट्रीय खेळाडू, प्रशिक्षक, आंतरराष्ट्रीय परीक्षक आणि श्री शिवछत्रपती पुरस्कार विजेत्या पूजा सुर्वे यांचे मार्गदर्शन लाभले आहे. संयुक्ताने खेलो इंडिया युवा खेळ, राष्ट्रीय स्पर्धा आणि इतर अनेक स्पर्धांमध्ये १२५ सुवर्णपदकांसह एकूण १५० पदके मिळवून आपली गुणवत्ता सिद्ध केली आहे. तसेच तिने आशियाई चॅम्पियनशिपमध्ये सातवा क्रमांक मिळवत आंतरराष्ट्रीय स्तरावर ठसा उमटवला आहे. संयुक्ता आणि प्रशिक्षक मानसी गावंडे हे दोघेही यापुढील कालावधीत भारतासाठी क्रीडा क्षेत्रात मोठे यश मिळवून देतील, असा विश्वास व्यक्त करण्यात येत आहे.
ब्राझील आणि भारताच्या वेळेत आठ तासाचा फरक आहे. त्यामुळे रिओमध्ये स्पर्धा सुरु होण्यापूर्वी क्रीडामंत्री ॲड. माणिकराव कोकाटे यांनी तिला दूरध्वनी केल्याचे सांगितले जाते. भारताचे प्रतिनिधित्व करताना सुवर्णपदक जिंकण्याच्या तिच्या क्षमतेवर विश्वास व्यक्त करुन तिला महाराष्ट्राची हिरकणी म्हणून संबोधत तिचा गौरव केला. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे, उपमुख्यमंत्री अजित पवार यांच्यावतीने मनःपूर्वक शुभेच्छा दिल्या. यावेळी तिच्या प्रशिक्षक मानसी गावंडे आणि पूजा सुर्वे यांच्यासह संयुक्ताच्या पालकांचे अभिनंदन केले. येत्या काळात आवश्यक असलेल्या क्रीडा सोयी सुविधासाठी थेट फोन करण्याचे आवाहन करायला क्रीडामंत्री कोकाटे विसरले नाहीत.
किमया कार्लेचेही क्रीडा मंत्र्यांकडून अभिनंदन
भारतीय रिदमिक जिम्नॅस्ट किमया कार्ले यांचेही क्रीडामंत्री कोकाटे यांनी अभिनंदन केले आहे. क्लुज-नापोका, रोमानिया २०२५ क्लब स्पर्धेत कार्लेने उत्कृष्ठ कामगिरी केल्याबद्दल त्यांनी किमयाला “रिदमिकची किमयागार” म्हणून अभिनंदनाचा दूरध्वनी केला. किमया हीसुद्धा पूजा सूर्वे आणि मानसी गावंडे यांच्याकडे प्रशिक्षण घेत आहे.
