नाशिक – राज्यात गाजत असलेल्या हनी ट्रॅप प्रकरणात वेगवेगळी चर्चा रंगली असताना नाशिक शहर किंवा अन्य बाहेरील पोलिसांनी नाशिक शहरातील कोणत्याही हॉटेलची तपासणी वा कारवाई केली नाही, असे स्पष्टीकरण अखेर नाशिक शहर पोलिसांना द्यावे लागले आहे. राज्यातील ७२ उच्च आजी-माजी अधिकारी, राजकीय नेते आणि काही मंत्री यांना हनीट्रॅपच्या जाळ्यात अडकविण्याचा प्रयत्न झाल्याचे प्रकरण विधिमंडळ अधिवेशनात गाजले. मुख्यमंत्री देवेंद्र फडणवीस यांनी विधानसभेत राज्यात कुठेच हनी ट्रॅप नसल्याचे स्पष्ट केले असतानाही या विषयाचे कवित्व संपलेले नाही.
नाशिकमधील काँग्रेसशी संबंधित ते हॉटेल कोणते, संशयित महिला कोण, याचा शोध राज्यभरातून घेतला गेला. एका पथकाने संबंधित हॉटेलच्या खोलीची तपासणी करून ती गोठविल्याची चर्चा रंगली. विधिमंडळ अधिवेशनात हनी ट्रॅपचा विषय चांगलाच गाजला. विरोधकांनी या प्रकरणावरुन सरकारची कोंडी करण्याचे प्रयत्न केले. विधिमंडळाच्या दोन्ही सभागृहात या प्रकरणात ठाण्यासह नाशिक शहराचा उल्लेख झाल्याने स्थानिक पातळीवर या विषयावर वेगवेगळी चर्चा होत आहे. बड्या अधिकारी व नेत्यांना हनी ट्रॅपमध्ये अडकवून कोट्यवधींच्या खंडणीची मागणी केली गेली. या संदर्भात महिलेने आणि नंतर महसूल विभागातील बड्या अधिकाऱ्याने दिलेल्या परस्परविरोधी तक्रारी मागे घेतल्या गेल्याचे सांगितले जाते. हनी ट्रॅपमध्ये अडकविण्याचा प्रकार ज्या शहरातील हॉटेलमध्ये झाल्याचे बोलले जाते, ते हॉटेल काँग्रेसच्या नेत्याच्या मालकीचे असल्याचा उल्लेख विधीमंडळातील चर्चेत झाला होता. त्यानंतर शहरातील काँग्रेसचा तो नेता कोण, हॉटेल कुठे, याचे शोधकार्य आपापल्यापरीने सुरू झाले.
याच दरम्यान पोलीस पथकाने संबंधित हॉटेलची तपासणी करून कारवाई केल्याच्या चर्चांनी वेग घेतला. अखेर शहर पोलिसांना कुठल्याही हॉटेलवर तशी कुठलीही कारवाई झाली नसल्याचे सांगावे लागले. हे सर्व घडूनही चर्चा थांबलेल्या नाहीत. या प्रकरणात ज्यांनी तक्रार दिली, त्यांनी ती मागे घेतली. त्यामुळे तक्रार दाखल करण्यासाठी कोणी नाही. यामुळे हे प्रकरण नक्की बंद होणार, याकडे काही जणांकडून लक्ष वेधले जाते.
काँँग्रेस गोत्यात ?
विधी मंडळातील चर्चेत हनीट्रॅपच्या माध्यमातून काही गोपनीय माहिती आणि कागदपत्रे असामाजिक तत्वांच्या हाती जाण्याची भीती विरोधकांनी व्यक्त केली. या प्रकरणाची सखोल चौकशी करण्याची मागणी करण्यात आली होती. काँग्रेसचे नेते नाना पटोले यांनी तर या संदर्भातील पेनड्राईव्ह आपल्याकडे असल्याचा दावा करत खळबळ उडवून दिली होती. सरतेशेवटी ज्या हॉटेलमध्ये हे प्रकार घडल्याची वंदता आहे, ते काँग्रेसच्या एका माजी पदाधिकाऱ्याशी संबंधित असल्याचे सांगितले गेल्याने पटोलेंसह काँग्रेसची एकप्रकारे अडचण झाल्याचे समोर आले.
