तीन बायका अन् चौथीसोबत प्रेमप्रकरण; मृत प्रेयसीच्या सॅंडलमुळे आरोपी जिम ट्रेनर अटकेत

उर्वशी वैष्णव असं २७ वर्षीय मृत तरुणीचं नाव आहे. तर रियाझ खान असं मुख्य आरोपीचं नाव आहे. आरोपी रियाझ खान हा जीम ट्रेनर आहे. तर मृत तरुणी एका बारमध्ये काम करते. आरोपी रियाझला तीन बायका आहेत. तरीही तो मृत उर्वशी वैष्णवसोबत लिव्ह इनमध्ये राहत होता.

हेही वाचा- मुंबई: १६ वर्षीय मुलीला ‘आयटम’ म्हणणं तरुणाला पडलं महागात, कोर्टाने सुनावली दीड वर्षांची शिक्षा

नवी मुंबई गुन्हे शाखा युनिट दोनचे वरिष्ठ निरीक्षक रवींद्र पाटील यांनी सांगितलं की, “आम्ही मुख्य आरोपी, देवनारचा जिम ट्रेनर रियाझ खान आणि कुरिअर डिलिव्हरी बॉय म्हणून काम करणारा त्याचा साथीदार इम्रान शेख याला अटक केली आहे. तसेच आम्ही मृतदेहाजवळ सापडलेल्या ब्रँडेड सँडलच्या मदतीने पीडितेची ओळख पटवण्यात आणि आरोपीचा शोध घेण्यात यशस्वी झालो.”

हत्येचं गूढ कसं उलगडलं?

मृत तरुणीच्या पायात सँडल घातला होता, ज्यावर संबंधित दुकानाचे नाव होते. दुकानाच्या नावावरून पोलिसांनी संबंधित दुकानाच्या सर्व शाखांना भेट दिली. मृत तरुणीचा फोटो दाखवून तपास केला. त्यासाठी दुकानातील आठ दिवसांचे सीसीटीव्ही फुटेज तपासले. दरम्यान, वाशी येथील चप्पल विक्रेत्याने मृत तरुणीला ओळखले. संबंधित तरुणी ६ डिसेंबर रोजी आपल्या दुकानात आली होती, अशी माहिती चप्पल विक्रेत्याने पोलिसांनी दिली. त्यानंतर पोलिसांनी सीसीटीव्ही फुटेज तपासले असता, मृत तरुणीची ओळख पटली. ती एका बॉडी बिल्डर व्यक्तीसोबत दुकानात आली होती. त्यावरून पोलिसांनी तपास करत दोन आरोपींना अटक केली आहे.

हेही वाचा- हृदयद्रावक: फिफा विश्वचषकाचा आनंद क्षणात विरला, मुंबईत पाचव्या मजल्यावरून पडून चिमुकल्याचा अंत

सहाय्यक पोलीस उपनिरीक्षक प्रवीण फडतरे यांनी दिलेल्या माहितीनुसार, “आरोपी रियाझ याची तीन लग्न झाली होती. तरीही तो मृत उर्वशीसोबत प्रेमसंबंधात होता. आरोपीनं तिला लग्नाचं आमिष दाखवलं होतं. उर्वशीने लग्नासाठी दबाव टाकल्यानंतर आरोपी रियाझने साथीदार इम्रान शेखच्या (२८) मदतीने उर्वशीची गळा दाबून हत्या केली. १३ डिसेंबर रोजी रात्री आरोपींनी उर्वशी वैष्णवचा मृतदेह धमणी गावाजवळील गढी नदीत फेकला.