नवी मुंबई : नवी मुंबई पोलीस आयुक्तालय हद्दीत गेल्या काही दिवसात सायबर गुन्हेगारांनी धुमाकूळ घातल्याचे चित्र आहे. शनिवारी एकाच दिवशी ९ गुन्ह्यांची नोंद झाली आहे. यात तब्बल १ कोटी ७८ लाख ९७ हजार ५८ रुपये सायबर गुन्हेगारांनी लांबवले आहेत. केवळ जून महिन्यात १२ वेगवेगळ्या सायबर गुन्ह्यात ४ कोटी ३६ लाख ९७ हजार ५८ रुपयांची फसवणूक झाली आहे. त्यामुळे सायबर साक्षरता करण्यास पोलीस कमी पडत असल्याचे चित्र आहे.
सीबीडी येथे राहणाऱ्या ६४ वर्षीय डॉक्टर व्यवसायीकाची १५ लाख ४० हजार ५६० रुपयांची फसवणूक झाली . त्यांना २२ मेला फोन करून एका व्यक्तीने डेटा प्रोटेक्शन बोर्ड ऑफ इंडियाच्या बेंगलोर कार्यालयातून बोलत असल्याचे सांगत मनी लॉन्ड्रींग , अतिरेकी संस्थांना आर्थिक मदत केल्याचा आरोप फिर्यादी यांना केला. तसेच डिजिटल अटक करण्याची धमकी देत १५ लाख ४० हजार ५६० रुपये स्वतःच्या खात्यात वळते करण्यास भाग पाडले. या दरम्यान फिर्यादी यांच्याशी संपर्क साधणाऱ्या चौकडी विरोधात गुन्हा नोंद करण्यात आला आहे.
खांदेश्वर येथे राहणाऱ्या ६१ वर्षीय जेष्ठ नागरिकाला कुलाबा पोलीस ठाण्यात तुमच्या विरोधात गुन्हा दाखल आहे. असे सांगून अटक कारवाईची धमकी देत वेगवेगळ्या दोन बँक खात्यात २४ लाख ९० हजार वळते करण्यास भाग पाडले. फोन वर बोलणाऱ्याने स्वतःची ओळख पोलीस अधिकारी अमित गुप्ता म्हणून करून दिली होती. हा सर्व प्रकार ७ डिसेंबर ते १२ डिसेंबर दरम्यान घडला.
नेरुळ येथे राहणाऱ्या एका ६१ वर्षीय महिलेस सहाय्यक पोलीस निरीक्षक संदीप शर्मा, सीबीआय अधिकारी विजय खन्ना, कायदे सल्लागार निशा पटेल यांनी फोन करून आमचे सिमकार्ड वापरून मनी लॉन्ड्रींग व्यवहार केला आहेत. कारवाईची धमकी देत त्यांच्या कडून विविध खात्यात १९ लाख रुपये वळते करण्यास भाग पाडण्यात आले. हा प्रकार १९ मार्च ते १७ एप्रिल दरम्यान घडला.दरम्यान फिर्यादी यांच्या पतीचे निधन झाल्याने त्यांनी या बाबत ६ तारखेला गुन्हा दाखल केला.
ऐरोली येथे राहणाऱ्या एका महिलेची समाज माध्यमातून मुकेश शर्मा यांच्याशी ओळख झाली होती. त्याने इंग्लंड वरून भेटवस्तू पाठवली असल्याचे सांगितले. दरम्यान सोनाली सिंग नावाच्या महिलेने फिर्यादी यांना फोन करून तुमची भेट वस्तू आली असून कस्टम कर भरून घेऊन जा. असे सांगत विविध स्वरूपाचे कर सांगत बँक खात्यात ४९ लाख ५९ हजार ९९९ रुपये भरण्यास भाग पाडले. हा प्रकार जून ते ऑगस्ट २०२४ दरम्यान घडला.
ऐरोली येथे राहणाऱ्या २८ वर्षीय तरुणीला नव्या पटेल, राकेश कुमार , स्वाती शर्मा आणि एक पोलीस अधिकारी यांनी संपर्क साधून आमच्या ओळख पत्रांचा गैर वापर केला आहे. असे सांगत कारवाईची धमकी देत विविध तीन बँक खात्यात २० लाख ३० हजार वळते करण्यास भाग पाडण्यात आले. हा प्रकार १ जानेवारी ते सहा जानेवारी दरम्यान घडला.
प्रिंटिंग प्रेसचा व्यवसाय असणाऱ्या एका व्यक्तीला कर्जाचे आमिष दाखवून १४ लाखांची फसवणूक केल्याचा प्रकार घडला आहे. फिर्यादी यांचे कार्यालय तुर्भे एमआयडीसी येथे आहे. . फेब्रुवारी मध्ये कौशिक लाठिया नावाच्या व्यक्तीने त्यांना फोन करून ७ कोटी रुपयांच्या कर्जाचे आमिष दाखवले होते. मात्र त्यासाठी स्टॅम्प ड्युटी म्हणून १४ लाख रुपये स्वतःच्या खात्यात भरण्यास भाग पाडले.होते.
घणसोली येथे राहणाऱ्या एका व्यक्तीची १० लाख २३ हजार ८०० रुपयांची ऑनलाईन फसवणूक झाली आहे. हि घटना २० मार्च ते २३मार्च दरम्यान घडली. चार अनोळखी व्यक्तींनी त्यांच्याशी समाज माध्यमातून संपर्क करून आम्ही पाठवलेल्या लिंकला लाईक करा आणि टास्क पूर्ण झाल्यावर पैसे घ्या असे आमिष दाखवले मात्र त्यासाठी आगाऊ रक्कम भरण्यास भाग पाडले होते.
पनवेल येथे राहणाऱ्या ३९ वर्षीय व्यक्तीने सट्टा बाजारात पैसे गुंतवा आणि भरघोस नफा कमवा अशा जाहिरातीला बळी पडून २३लाख १७ हजार ४९९ रुपये गमावले आहेत. हा प्रकार फेब्रुवारी ते ९ एप्रिल दरम्यान घडला. या प्रकरणी जीएमझेड या इंटरनॅशनल कंपनी ट्रेडिंगच्या नावाने व्हाट्स अप वर चॅटिंग करणाऱ्या २२ जणांच्या विरोधात गुन्हा दाखल करण्यात आला आहे. अशाच प्रकारे नेरुळ येथे राहणाऱ्या ४६ वर्षीय व्यक्तीची २३ लाख ६० हजार रुपयांची फसवणूक झाल्याचे समोर आले आहे. फिर्यादी यांना सट्टा बाजारात आमच्या द्वारे गुंतवणूक करा भरघोस परतवा मिळेल असे आमिष दाखवून विविध बँक खात्यात गुंतवणूक रक्कम घेण्यात आली होती हा प्रकार ७मार्च ते २४ एप्रिल दरम्यान घडला आहे.
