वाशी रुग्णालयातील डॉक्टर गैरहजर

नवी मुंबई : वाशी येथील महापालिका सार्वजनिक रुग्णालयास पालिका आयुक्तांनी मंगळवारी अचानक भेट दिली. यात पालिका सेवेत ऑनकॉलवर असलेले आठ आरोग्य अधिकारी गैरहजर असल्याचे समोर आले. त्यांना नोटिसा बजावण्यात आल्या असून पालिका आयुक्त अभिजीत बांगर यांनी चौकशीचे आदेश दिले आहेत.

करोनासाठी असलेले हे रुग्णालय नुकतेचे सार्वजनिक करण्यात आले आहे. येथील आरोग्य सेवेची पाहणी आयुक्तांनी अचानक भेट देत केली. यात हजेरीपत्रक तपासताना ऑनकॉल वैद्यकीय अधिकारी अनुपस्थित असल्याचे आढळून आले. याबाबत खुलासा घेऊन पुढील कारवाई केली जाणार आहे. हजेरी पत्रकात त्यांच्या यापूर्वीच्या काळातील उपस्थितीची स्वाक्षरी नसल्याचे आढळून

आल्याने याबाबत चौकशी करण्याचे निर्देश देण्यात आले. हे डॉक्टर ऑनकाल सेवेत असली तरी त्यांनी सेवाकाळात उपस्थित असणे बंधनकारक असते.  पूर्वीच्या तुलनेत सध्या रुग्णालयातील रुग्णसंख्या कमी होती. त्यामुळे येथील वैद्यकीय अधिकाऱ्यांना त्यांनी हे रुग्णालय परत इतर रुग्णांसाटी सुरू झाल्याचे  नागरिकांपर्यंत पोहचवा अशा सूचना दिल्या. शस्त्रक्रियेची संख्या वाढविण्याबाबतही सांगण्यात आले.  येथील शौचालयांच्या स्वच्छतेबाबत आयुक्तांनी नाराजी व्यक्त केली.

हजेरी पुस्तक ताब्यात

यावेळी पालिका आयुक्तांनी हजेरी पुस्तक तपासले असता यात अनेक जण अनेक दिवसांपासून सेवेत असताना त्यावर स्वाक्षरी नसल्याचे समोर आल्यानंतर त्यांनी हजेरी पुस्तकच ताब्यात घतले आहे. त्यामुळे चौकशीत यात आणखी अनेकजण अडकण्याची शक्यता वर्तवली जात आहे.