प्रकल्पग्रस्त-सिडकोत विसंवाद

शस्त्रधारी सुरक्षा रक्षकांमुळे विमानतळ प्रकल्पग्रस्तांमध्ये नाराजी

नवी मुंबई विमानतळ प्रकल्पात बाधित होणाऱ्या पारगाव व वरचा ओवळा ग्रामपंचायतींनी सिडकोकडे प्रलंबित असलेल्या प्रश्नांवर चर्चेसाठी वेळ मागूनही प्रकल्पग्रस्तांना वेळ मिळत नसल्याने सिडको आणि विमानतळ प्रकल्पग्रस्त यांच्यामध्ये संवादाची दरी वाढत असल्याचे दिसून येत आहे. विमानतळ प्रकल्पातील काही स्थापत्य कामे सुरु झाली असून या कामांसाठी येणाऱ्या साहित्याच्या संरक्षणासाठी नेमण्यात आलेले सुरक्षा रक्षक हे एक नाराजीचे कारण असून अशा प्रकारे सिडकोने दहशत निर्माण करण्याचा प्रयत्न केल्यास सुरु झालेला सुसंवाद खुंटण्याची शक्यता वर्तवली जात आहे.

केंद्र व राज्य सरकारचा महत्वाकांक्षी प्रकल्प असलेल्या नवी मुंबई विमानतळाचे प्रत्यक्षात काम सुरु होण्यास आता काही महिन्यांचा कालावधी शिल्लक आहे. त्यासाठी निविदा प्रक्रिया अंतीम टप्यात असून पुढील वर्षांच्या सुरुवातील ही निविदा एखाद्या विकासाला दिली जाणार आहे. याच काळात सिडकोने १७०० कोटी रुपये खर्चाची कामे विविध ठेकेदारांना दिली असून सपाटीकरण, टेकडी उंची कपात, उच्च दाबाच्या वाहिन्या भूमिगत करण्याच्या कामांना सुरुवात केली जात आहे. याचवेळी दहा गावातील प्रकल्पग्रस्तांनी स्थलांतर आणि भूखंड करारनाम्यांना विरोध करण्यास सुरुवात केली आहे. या गावातील प्रकल्पग्रस्तांच्या काही मागण्या अद्याप प्रलंबित असल्याने हा विरोध असून सिडकोने या मागण्यांचा सहानभूतीने विचार करावा अशी अपेक्षा व्यक्त केली आहे. संवादाची ही दरी गेली अनेक वर्षे सुरु असताना ती सध्या बंद करण्यात आल्याने प्रकल्पग्रस्तांमध्ये सिडकोच्या विरोधात नाराजी पसरु लागली आहे. त्यात पारगाव व वरचा ओवळा ग्रामपंचायतींनी सिडकोचे व्यवस्थापकीय संचालक भूषण गगराणी यांच्याकडे पंधरा दिवसापूर्वी चर्चेसाठी वेळ मागितली आहे पण ती अद्याप न देण्यात आल्याने या नाराजीत भर पडू लागली आहे. सिडको दहा गावातील प्रकल्पग्रस्तांना एकच न्याय देण्याऐवजी दुजाभाव करीत असल्याचा आरोप माजी सरपंच महेंद्र पाटील यांनी केला आहे.

सिडको सव्‍‌र्हेक्षणातून सुटलेल्या सर्वच घरांना पर्यायी भूखंड देण्याची मागणी प्रकल्पग्रस्त करीत असून कोल्ही, वरचा ओवळा येथील ८० प्रकल्पग्रस्ताच्या पुर्नवसनाचा प्रश्न अद्याप प्रंलबित आहे. गावातील एकाही प्रकल्पग्रस्तांवर अन्याय झाल्यास इतर प्रकल्पग्रस्त सिडकोच्या सेवा सुविद्या स्विकारणार नाहीत अशी भूमिका प्रकल्पग्रस्तांनी व्यक्त केली आहे. बेकायदेशीर बांधकामांना तीन पट भूखंड देताना त्यात दुजाभाव न करता सर्वच गावांना एकसारखा न्याय देण्यात यावा अशी या प्रकल्पग्रस्तांची मागणी असून या दहा गावातील तरुणांना सुरक्षा रक्षक म्हणून काम देण्याऐवजी खासगी एजन्सींना काम देऊन सिडको तणावाचे वातावरण निर्माण केले आहे. सिडकोने नवी मुंबई विमानतळ गाभा क्षेत्रात सुरु होणाऱ्या स्थापत्य कामांच्या साहित्य व अधिकाऱ्यांच्या संरक्षणासाठी ३४ सशस्त्रधारी सुरक्षा रक्षक तैनात केले असून सिडकोची ही उपाययोजना प्रकल्पग्रस्तांच्या जिव्हारी लागली आहे. सिडकोच्या एकूण सुरक्षा रक्षक मंडळातील १२५ सुरक्षा रक्षक हे याच भागातील असून ते नोकरी बरोबरच सिडकोशी सुसंवाद कायम ठेवण्याचे काम करीत असल्याचे प्रकल्पग्रस्तांनी सांगितले. या उलट सिडको खासगी सुरक्षा रक्षकांना वाहनांचा ताफा देऊन तणाव व दहशत निर्माण करण्याचा प्रयत्न करीत असल्याचा आरोप केला जात आहे.