दिवाळीनंतर करोना रुग्णांत वाढ झाल्याने ३५२ दिवसांवर गेलेला रुग्णदुपटीचा कालावधी कमी होत २६५ दिवसांवर आला होता. आता गेल्या काही दिवसांपासून बाधितांची संख्या पुन्हा कमी झाल्याने हा कालावधी आता ६१६ दिवस म्हणजे एक वर्ष सहा महिन्यांपर्यंत गेला आहे.
दिवाळीपूर्वी शहरात करोना रुग्णदुपटीचा कालावधी हा ११ नोव्हेंबर रोजी ३५२ दिवसावर गेला होता. त्यानंतर नागरिकांनी बेफिकिरी करीत दिवाळीच्या खरेदीसाठी मोठया संख्येने घराबाहेर पडले. यावेळी नियमांचे पालन केले नाही. त्यामुळे करोनाबाधितांच्या संख्येत वाढ झाली. दिवाळीपूर्वी शंभरच्या खाली आलेली करोनाबाधितांची संख्या परत दोनशेच्या घरात पोहचली. भाऊबीजेच्या दिवशी शहरात ६१ नवे करोनाबाधित आढळले होते. ही या काळातील सर्वात कमी रुग्णांची नोंद झाली होती. मात्र त्यानंतर रुग्णसंख्या दुपटीने वाढत गेली होती. त्यामुळे ३५२ दिवसांवर गेलेला रुग्णदुपटीचा कालावधी कमी होत २६५ दिवसांवर आला होता. आता पुन्हा करोना रुग्णांची संख्या कमी झाली आहे.
या आठवडय़ात रुग्णसंख्या ५० च्या जवळपास आलेली पाहायला मिळत आहे. त्यामुळे रुग्णदुपटीचा कालावधी हा दीड वर्षांपेक्षा अधिक दिवसावर गेला आहे, ही शहरासाठी दिलासादायक बातमी आहे. नागरिकांनी करोनाचे नियम पाळणे अत्यंत आवश्यक असल्याचे पाालिका प्रशासनाने सांगितले आहे.
रुग्णदुपटीचा कालावधी
* १५ ऑगस्ट : ४५ दिवस
* १५ सप्टेंबर : ६७ दिवस
* १५ ऑक्टोंबर : १११ दिवस
* १५ नोव्हेंबर : ३५२ दिवस
* १५ डिसेंबर : ४५४ दिवस
* ३० डिसेंबर : ६१६ दिवस
८४ नवे रुग्ण
मंगळवारी ८४ नवे करोनाबाधित आढळले असून दोन जणांचा मृत्यू झाला आहे. तर ५९ जण करोनामुक्त झाले. शहरातील करोनाबाधितांची संख्या ५०,९३५ इतकी झाली असून मृतांचा आकडा १०५० इतका झाला आहे.
