रुग्णसंख्येपुढे सुविधा तोकडय़ा; अनेक तपासणी यंत्रे बंद
नवी मुंबई महापालिका वाशी संदर्भ रुग्णालय
कोपरखैरणे आणि तुर्भे येथील माता-बाल रुग्णालये बंद असल्यामुळे तसेच नेरुळ, बेलापूर, ऐरोली येथील रुग्णालये केवळ बाह्य़रुग्ण विभाग आणि सामान्य प्रसूतीपर्यंतच सीमित राहिल्यामुळे संपूर्ण नवी मुंबईचा भार वाशी येथील रुग्णालयावरच पडत आहे. वाढत्या रुग्णसंख्येपुढे या रुग्णालयातील सेवाही अपुऱ्या पडू लागल्या आहेत. महापालिका क्षेत्रातील जवळपास सर्वच रुग्णालयांतून शस्त्रक्रिया आणि अन्य आजारांसाठी वाशी रुग्णालयाचाच संदर्भ दिला जात असल्याने येथील कर्मचाऱ्यांवर कामाचा प्रचंड ताण पडत आहे.
महापालिका प्रशासनाने विधानसभा निवडणुकीपूर्वी नेरुळ, बेलापूर, ऐरोली येथील रुग्णालयांत बाह्य़रुग्ण विभाग सुरू केले. सेवा पूर्णपणे सुरू होणार नसल्यामुळे बाह्य़रुग्ण विभाग सुरू करण्यास प्रचंड विरोध झाला होता. महापालिका निवडणुकीच्या आचारसंहितेपूर्वी संपूर्ण रुग्णसेवा सुरू होईल, अशी नागरिकांची अपेक्षा होती, परंतु अत्यावश्यक साधने व इतर सोयीसुविधांअभावी ते होऊ शकले नाही. बाह्य़रुग्ण विभाग सुरू होऊन दोन वर्षांपेक्षा जास्त कालावधी उलटला, तरीही संपूर्ण सेवा सुरू न झाल्याने रुग्णालयांच्या इमारती केवळ शोभेपुरत्याच उरल्या आहेत. या रुग्णालयांवर अपेक्षेपेक्षा दुप्पट खर्च झाल्यानंतरही प्रत्येक रुग्णालयातून रुग्णांना वाशी येथील संदर्भ रुग्णालयात पाठवले जात आहे. त्यामुळे वाशी येथील रुग्णालयात सेवेचा बोजवारा उडाला आहे.
वाशी रुग्णालयावर रुग्णांचा एवढा भार पडत आहे की, खाटांची क्षमता संपल्यामुळे रुग्णांना जमिनीवर गाद्या टाकून झोपवले जात आहे. जागाच नसल्यामुळे शहरातील हजारो गर्भवतींना कळवा रुग्णालय किंवा मुंबईतील रुग्णालयांचा रस्ता दाखवला जातो. या प्रवासात काही गर्भवतींची रुग्णवाहिकेतच प्रसूती झाली आहे. वाशी रुग्णालयात केसपेपरसाठी चारच काउंटर आहेत. त्यामुळे नागरिकांना लांबलचक रांगांमध्ये ताटकळत उभे राहावे लागते. रुग्णालयातील अतिदक्षता विभागातील १० पैकी ५ व्हेंटिलेटर बंद पडले आहेत. एनआयसीयू विभाग पूर्णपणे बंद आहे. नवजात शिशूला अतिदक्षता विभागात ठेवण्यासाठी आवश्यक सुविधाच येथे नाहीत. त्यामुळे रुग्णांना नाइलाजाने खासगी रुग्णालयात खर्चीक उपचार घ्यावे लागतात.
या रुग्णालयातील क्ष-किरण यंत्र व मोतिबिंदू शस्त्रक्रिया करण्यासाठी आवश्यक असणारे यंत्र बंद आहे. अग्निशमन यंत्रणाही बंद आहे. अशा स्थितीत एखादी दुर्घटना घडल्यास रुग्णांनी बाहेर निघायचे कसे, असा प्रश्न उपस्थित झाला आहे. वाशी रुग्णालयात ३०० खाटांची सोय आहे. ऑपरेशन थिएटरमध्ये रुग्णांना झोपवण्यासाठी वापरण्यात येणाऱ्या बेडची दुरवस्था झाली आहे. दंतचिकित्सेसाठी बाह्य़रुग्णसेवा कार्यरत आहे, मात्र पुढील उपचारांसाठी यंत्रे नाहीत, त्यामुळे तेरणासारख्या रुग्णालयांचा संदर्भ दिला जातो. अपघात विभाग नाही. ट्रॉमा सेंटरमध्ये केवळ छोटय़ा शस्त्रक्रिया होतात. तज्ज्ञांअभावी मोठय़ा शस्त्रक्रियांसाठी हिरानंदानीसारख्या बडय़ा रुग्णालयांचा संदर्भ दिला जातो, असे सूत्रांनी सांगितले.
२००४ साली प्रशासनाने डायलिसिस, सीटी स्कॅन व एमआरआय सेवेची मागणी केली. २००७ साली संबंधित यंत्रणांसाठीचा प्रस्ताव महासभेत मंजूर करण्यात आला. डायलिसिसची सोय झाली, परंतु सीटी स्कॅन, एमआरआय यंत्रणा अद्याप कार्यान्वित झालेल्या नाहीत. त्यासाठी फोर्टिज किंवा अन्य खासगी रुग्णालयांचा संदर्भ दिला जातो. निवासी डॉक्टर रात्री हजर नसतात ते दुपारीच निघून जातात, असे सूत्रांनी सांगितले. त्यामुळे एनवेळी रात्री एखादा रुग्ण दाखल झाल्यास उपचारांसाठी गैरसोय होते. ऑपरेशनच्या आधी ज्या चाचण्या केल्या जातात. त्यासाठी आवश्यक असलेली ३-४ नवीन यंत्रे ऑपरेशन थिएटरमध्ये वापराविना धूळखात पडून आहेत. ऑपरेशन करताना भूल देण्यासाठी किंवा ऑक्सिजन ठेवण्यासाठीचे बॉइल मशीन नाही. फोर्टिजशी महापालिकेचा करार असून गरजू रुग्णांना सवलतीच्या दरात सेवा उपलब्ध करून दिली जाते. दरवर्षी किमान ८०० रुग्णांना ही सेवा देण्यात येते. परंतु या सेवेचा लाभ राजकीय पुढाऱ्यांच्या शिफासशीशिवाय मिळत नसल्याचे, प्रवीण बामदरे यांनी सांगितले.
अधिकारी, कर्मचारी संख्या
मुख्य वैद्यकीय अधिकारी १
निवासी डॉक्टर २
शल्यचिकित्सक ४
नवजात शिशुतज्ज्ञ १
शल्यचिकित्सक ३
वैद्यकीय नोंदी अधिकारी १
प्रसूतीतज्ज्ञ ३
बालरोगतज्ज्ञ ७
अस्थिरोग तज्ज्ञ ६
निवासी स्त्री रोगतज्ज्ञ १
दंतचिकित्सक २
नेत्ररोगतज्ज्ञ ३
कान-नाक-घसा तज्ज्ञ ३
रक्त संक्रमण अधिकारी ३
बधिरिकरणतज्ज्ञ ६
त्वचारोगतज्ज्ञ १
मानपसोचारतज्ज्ञ १
क्षयरोग वैद्यकीय अधिकारी २
शरीरविकृती शास्त्रतज्ज्ञ १
मौखिक आरोग्य तज्ज्ञ १
नेत्रचिकित्सा साहाय्यक २
नेफ्रॉलॉजिस्ट १
दंत शल्यचिकित्सक ४
स्त्रीरोगतज्ज्ञ ३
अपघात वैद्यकीय अधिकारी ५
रक्तपेढीतज्ज्ञ ७
प्रयोगशाळा तंत्रज्ञ १४
वैद्यकशास्त्र तज्ज्ञ १
भौतिकोपचार तज्ज्ञ २
परिचारिका २३७
