ऐरोली, कोपरखैरणे तहानलेलेच!

मोरबे धरण क्षेत्रात मुबलक पाऊस पडूनही नवी मुंबईतील ऐरोली व कोपरखैरणे हा सर्वाधिक लोकवस्तीचा उत्तर भाग आजही तहानलेला असून गृहिणींना एक वेळ येणाऱ्या पाण्यावर गुजराण करावी लागत आहे. त्यामुळे पहाटे लवकर उठून पाणी भरून ठेवण्याची कसरत सर्व महिला करीत असून तिसऱ्या मजल्यानंतर नळाच्या पाण्याचा दाब अत्यंत कमी होत असल्याने पाणी नळाला येऊन उपयोग नसल्याची प्रतिक्रिया व्यक्त केली जात आहे. चोवीस तास पाणीपुरवठा ही नवी मुंबईची ओळख यामुळे आता पुसली जाणार असे दिसून येत आहे.

१२ लाख लोकसंख्येला नवी मुंबई पालिका पाणी वितरणाचे नियोजन करीत असून ते सध्या फोल ठरले आहे. शहराची लोकसंख्या १२ लाखांपेक्षा चार लाखाने वाढली असून त्याची दखल घेतली गेलेली नाही. त्यामुळे मोरबे धरणातून सध्या ३२० दशलक्ष लिटर पाण्याचा उपसा दररोज शहरासाठी केला जात असून तो अपुरा पडत आहे. १२ लाख लोकसंख्येला प्रति माणसी १३५ लिटर पाणी मिळणे आवश्यक असून त्याच गणितावर आधारित हा पुरवठा केला जात असल्याने शहरातील पाणीवाटपात विरोधाभास निर्माण झाला आहे. नवी मुंबईच्या सीबीडी, नेरुळ, वाशी, तुर्भे या दक्षिण भागांत सध्या नेरुळ येथील सेक्टर दोन व आठ वगळता मुबलक पाणी असून कोपरखैरणे येथील अर्धा भाग व ऐरोलीतील २५ टक्के भागातील रहिवाशांवर पाणीविना दाहीदिशा फिरण्याची वेळ आली आहे. ऐरोलीत पाणी मिळत नसल्याच्या २० तक्रारी मागील दोन दिवसांत पालिकेकडे दाखल झाल्या असून त्यात तथ्य आढळून आले आहे.  त्यामुळे सकाळी एक वेळ दोन तास मिळणाऱ्या पाण्याचा साठा करून ठेवण्यावर गृहिणींचा कल वाढू लागला असून बाथरुमच्या छपरावर ठेवण्यात आलेल्या वैयक्तिक टाक्यादेखील अपुऱ्या पडू लागल्या आहेत. त्यामुळे घरात मिळेल त्या भांडय़ात पाणी साठवून ठेवण्याची अहमहमिका वाढली आहे. त्यात मुंबई, ठाणे भागांत असलेल्या सोसायटी कूपनलिकांचा नवी मुंबईत आधार मिळणे दुरापास्त झाले असूून या ठिकाणी सोसायटींना मारलेल्या कूपनलिकांना लागणारे पाणी हे खारट असल्याचे आढळून आले आहे. मोरबे धरणाची पाणीपातळी ८० मीटपर्यंत भरली असली तरी संपूर्ण धरणात ६५ टक्के  पाणी जमा झालेले आहे. त्यामुळे पालिका आहे ते पाणी जपून वापरत आहे, मात्र पाण्याचे रेशनिंग सुरू असल्याने शहराचा अर्धा भाग तुपाशी तर अर्धा भाग उपाशी अशी स्थिती निर्माण झाली आहे. मोरबे येथून उपसा होणाऱ्या पाण्यात वाढ झाल्यास शहरातील शेवटच्या घटकापर्यंत आवश्यक तेवढे पाणी पोहोचू शकणार आहे. सध्या मोरबे धरणातून ३२० पर्यंत पाण्याचा उपसा केला जात असून तो ३८० पर्यंत होणे आवश्यक आहे.  अनियमित पाणीपुरवठय़ाबद्दल महिला नगरसेविका शुक्रवारी रणकंदन माजवणार होत्या.

नवी मुंबईच्या काही भागात कमी पाणी पुरवठा होत आहे ही वस्तुस्थिती आहे. त्याला काही कारणे असून ऐरोली व कोपरखैरणे भागात ही स्थिती आढळून येत आहे. काही ठिकाणी दाब कमी आहे तर ऐरोलीसाठी एकच जलकुंभ काम करीत असल्याने कमी पाणी पुरवठा होत आहे. येथील काही भागाला एमआयडीसीकडून पाणी पुरवठा केला जात असल्याने त्यांचे शट डाऊन आणि कमी पुरवठा यामुळे ही अडचण निर्माण होत आहे. कोपरखैरण्यातील पाणी पुरवठय़ासाठी तेथील विद्युत फीडर बदलण्याचे काम लवकरच हाती घेतले जाणार आहे. काही ठिकाणी पाण्याचा योग्य पुरवठा केला जात असताना रहिवाशांना पाणी मिळत नाही. त्यामागे सोसायटीतील अंर्तगत पाणी चोरी व पाण्याचा गैरवापर कारणीभूत आहे.

अंकुश चव्हाण, अतिरिक्त आयुक्त, नवी मुंबई पालिका

सोसायटीत सकाळी केवळ दहा मिनिटे पाणी येत असून शक्य तेवढे पाणी साठवून ठेवले जात आहे. ज्या घरात जास्त माणसं आहेत. त्यांना कमी वेळेत आलेले पाणी पुरणे शक्य नाही. त्यामुळे आता पाण्याचे अच्छे दिन सरल्याचे दिसून येते.

विश्वनाथ साळवी, अमृतवेळ सोसायटी, सेक्टर २