हिंदुत्त्वाच्या राजकारणात दाेन शिवसेनेमध्ये आक्रमकपणाचा खेळ

शिवसेनेच्या उद्धव ठाकरे गटास मात्र छत्रपती संभाजीनगर शहरात ‘ हिदूत्त्वा’ च्या नव्या भूमिका मांडण्याची कसरत करावी लागते. विधानसभेच्या निवडणुकीमध्ये उद्धव ठाकरे गटास मुस्लिम मतदारांनी पसंती दिली होती. मात्र, उमेदवार निवडून आला नाही. त्यामुळे पूर्वीसारखी ‘ हिरवा साप’ ‘ रझाकाराची औलाद’ असे शब्द उद्धव ठाकरे गटाचे नेते आता जाहीर कार्यक्रमांमध्ये वापरत नाहीत. मात्र, राम नवमीच्या शुभेच्छा, पाडव्या दिवशीची हिंदू जनजागृती यात्रांमधून ‘ आम्ही हिंदूंत्त्व सोडले नाही’ असा संदेश द्यावा लागतो. नुकतेच शिवसेना नेते चंद्रकांत खैरे यांनी अशी यात्रा काढली तर अंबादास दानवे यांनी शहरातील प्रमुख चौकात शुभेच्छांचे संदेश फलकावर लावले.

शिवसेना एकनाथ शिंदे यांचे समर्थकांमधील संजय शिरसाट, खासदार संदीपान भुमरे ही नेते मंडळी उद्धव ठाकरे यांच्या समर्थकांना ‘ हिंदूत्त्वा’ वरुन कोंडीत पकडण्याचा प्रयत्न करत असतात. औरंगजेबाच्या कबरीवरुन आणि आता खुलताबादचे नाव रत्नपूर करावे या मागणीसाठीही पुन्हा एकदा संजय शिरसाट यांनी उद्धव ठाकरे गटास डिवचले आहे. भाजपचे नेते मात्र, या सगळ्या आरोप -प्रत्यारोपातून दूर आहेत.

शहरात १५ दिवसाला एकदा पाणी येते आहे, पिण्याच्या पाण्याची ओरड सुरू आहे. दररोज न्यायालयातून फटकार मिळत आहे. मात्र, छत्रपती संभाजीनगर शहरातील नेत्यांमध्ये हिंदूत्त्वावरुन आक्रमक कोण यावरुन स्पर्धा लागली आहे अशी प्रतिक्रिया व्यक्त होत आहे. दरम्यान संजय शिरसाट हे गेल्या १५ दिवसापासून सातत्याने एकनाथ शिंदे यांची शिवसेनाच अधिक आक्रमक असल्याचे संदेश आपल्या वक्तव्यातून देत आहेत.