07 July 2020

News Flash

शहर बकाल करणाऱ्यांचा मुलाहिजा ठेवू नका – अजित पवार

हौदात विसर्जन झालेल्या मूर्ती पुन्हा नदीत विसर्जित करीत शहर बकाल करणाऱ्यांचा मुलाहिजा ठेवू नका

हौदात विसर्जन झालेल्या मूर्ती पुन्हा नदीत विसर्जित करीत शहर बकाल करणाऱ्यांचा मुलाहिजा ठेवू नका, असे आदेश माजी उपमुख्यमंत्री अजित पवार यांनी महापौरांना दिले.
राज्यातील दुष्काळी परिस्थिती आणि शहरातील पाणीटंचाईच्या पाश्र्वभूमीवर मानाच्या गणपतींनी महापालिकेच्या हौदामध्ये गणेशमूर्तीचे विसर्जन केले. महापौर दत्तात्रय धनकवडे यांनी केलेल्या आवाहनाला प्रतिसाद देत शहरातील अनेक गणेश मंडळांनी आपल्या श्रींच्या मूर्तीचे हौदामध्येच विसर्जन केले. मात्र, हौदामध्ये विसर्जित केलेल्या मूर्ती पुन्हा नदीमध्ये विसर्जित करण्याचा प्रकार उघडकीस आला आहे. त्या पाश्र्वभूमीवर अजित पवार यांनी गुरुवारी एका कार्यक्रमामध्ये हा विषय उपस्थित करून महापौरांना कडक कारवाईचे आदेश दिले.
अजित पवार म्हणाले,‘एकदा हौदामध्ये विसर्जन झालेल्या मूर्ती पुन्हा नदीमध्ये आणून टाकण्याचे काम करण्याच्या प्रकाराला कोण अधिकारी दोषी आहेत त्यांचा मुलाहिजा ठेवू नका. त्याचे आई-बाप कोणीही असो, त्याच्याविरोधात कारवाई करताना कचरू नका. पुणेकर नागरिक तीव्र पाणीटंचाईला सामोरे जात असताना नदीचे प्रदूषण होऊ नये यासाठी झालेला निर्णय डावलून शहराला बकाल करण्याचा प्रयत्न कोणी करत असेल, तर अशा प्रवृत्तीला शिक्षा ही झालीच पाहिजे.
ज्या ट्रकमधून या गणेशमूर्ती नदीमध्ये विसर्जित करण्यात आल्या त्या ट्रकवाल्याला दहा हजार रुपये दंड ठोठवा. या ट्रकची माहिती देणाऱ्या व्यक्तीस साडेसात हजार रुपयांचे बक्षीस द्या, जेणेकरून अशा प्रवृत्तीला आळा बसेल आणि महापालिकेच्या तिजोरीमध्ये अडीच हजार रुपयांची भर पडेल, असेही अजित पवार यांनी महापौरांना सांगितले.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on October 2, 2015 3:11 am

Web Title: ajit pawar pmc mayor ganesh idol
टॅग Ganesh Idol,Mayor,Pmc
Next Stories
1 आंबेडकरी चळवळीतील नेत्यांना राजा ढाले यांच्या कानपिचक्या
2 मुंबई लोकलमधील बॉम्बस्फोटातील पुण्यातले दोन आरोपी दहा वर्षांपासून फरार
3 झोपडपट्टी पुनर्वसनाचा वादग्रस्त प्रस्ताव पालिकेत बहुमताने मंजूर
Just Now!
X