पुणे शहरात करोना विषाणूंचे रुग्ण मोठ्या प्रमाणावर वाढत आहे. त्या पार्श्वभूमीवर पुणे महापालिके मार्फत आयसीएमआर मान्यता प्राप्त 1 लाख रॅपिड अँटिजेन टेस्ट किट खरेदी केले आहेत. हे सर्व किट दाखल झाले असून यामुळे एखाद्या व्यक्तीला करोना झाला आहे किंवा नाही, याबाबतची माहिती केवळ अर्ध्या तासात समजणार आहे. अशी माहिती महापौर मुरलीधर मोहोळ यांनी दिली. यावेळी महापौर मुरलीधर मोहोळ म्हणाले की, पुणे शहरातील करोना रुग्णाची वाढती संख्या लक्षात घेता. स्थायी समिती मार्फत 1 लाख रॅपिड अँटिजेन टेस्ट किट खरेदी करण्याचा निर्णय घेतला गेला. या एका किटची किंमत 450 रुपये असून एखादा व्यक्ती बाधित असल्यास, त्या व्यक्तीच्या संपर्कात आलेल्या हाय रिस्क व्यक्तिच्या तपासण्या करण्यास अधिक फायदेशीर ठरणार आहे. यापुर्वी एखाद्याचे रिपोर्ट येण्यास साधारण दोन दिवसांचा कालावधी लागत होता. आता या किटच्या माध्यमातुन केवळ अर्ध्या तासात रिपोर्ट मिळणार आहे. यामुळे बाधित रुग्णावर तातडीने उपचार होण्यास मदत होणार आहे. तसेच ते पुढे म्हणाले की, शहरातील खासगी रुग्णालयामध्ये देखील, या किटचा वापर करण्याचे आवाहन त्यांनी यावेळी केले.
