पुण्यातील कोथरूड परिसरात रविवारी रात्री गस्त घालत असलेल्या पोलिसांच्या अंगावर कार घालण्याचा प्रयत्न करण्यात आला. यामध्ये एक पोलीस कर्मचारी जखमी झाला असून, त्यांच्यावर रुग्णालयात उपचार सुरू आहेत. केदारी असे जखमी झालेल्या पोलिसाचे नाव असल्याची माहिती मिळाली आहे. या घटनेनंतर पोलिसांनी तपास करून संशयास्पद कार कोथरूडमधील गोपीनाथनगरमधून ताब्यात घेतली.
पोलिसांकडून मिळालेल्या माहितीनुसार, रविवारी रात्री उशीरा कोथरूडमध्ये गस्त घालत असताना एक संशयास्पद कार त्यांना दिसली. पोलिसांनी कारच्या दिशेने जाण्याचा प्रयत्न केल्यावर कारचालकाने त्यांच्या अंगावर गाडी घातली. यामध्ये केदारी जखमी झाले. त्यांच्यासोबत असलेले पोलीस उपनिरीक्षक प्रेम वाघमोरे यांनी त्यांच्याकडील सर्व्हिस रिव्हॉल्वरमधून संशयिताच्या दिशेने गोळीही झाडली. पण कारचालक वेगाने पळून गेला. त्यानंतर केदारी यांना रुग्णालयात दाखल करण्यात आले. पोलिसांनी सोमवारी सकाळी संशयास्पद गाडी गोपीनाथनगर भागातून ताब्यात घेतली. अधिक तपास करण्यात येतो आहे.