पुणे : लष्करी अधिकारी असल्याच्या बतावणीने सायबर चोरट्याने कोथरुड भागातील एका ज्येष्ठ नागरिकाची पाच लाख ३५ हजार रुपयांची फसवणूक केली. याप्रकरणी सायबर चोरट्याविरुद्ध कोथरुड पोलिसांनी गुन्हा दाखल केला.
याबाबत एका ज्येष्ठाने कोथरूड पोलीस ठाण्यात फिर्याद दिली आहे. त्यांनी दिलेल्या फिर्यादीनुसार एका बंँक खातेधारकाविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार कोथरुडमधील गुरुगणेशनगर भागातील एका सोसायटीत राहायला आहेत. डिसेंबर महिन्यात चाेरट्याने ज्येष्ठाच्या मोबाइल क्रमांकावर संपर्क साधला. त्याने लष्करात अधिकारी असल्याची बतावणी केली. कोथरूड भागात सदनिका भाडेतत्त्वावर घ्यायची आहे, अशी बतावणी केली. त्यानंतर चोरट्याने त्यांना अनामत रक्कम पाठवितो, असे त्यांना सांगितले.
चोरट्याने ज्येष्ठाच्या बँक खात्याची माहिती घेतली. बँक खात्याच्या माहितीचा गैरवापर करुन चोरट्याने ज्येष्ठाच्या खात्यातून पाच लाख ३५ हजार २०० रुपये चोरुन नेले. फसवणूक झाल्याचे लक्षात आल्यानंतर तक्रारदाराने फिर्याद दिली. वरिष्ठ पोलीस निरीक्षक संदीप देशमाने तपास करत आहेत.
कोथरुड भागातील एकाची २९ लाखांची फसवणूक
सायबर चोरट्यांनी कोथरुड भागातील आणखी एकाची फसवणूक केली. शेअर बाजारात गुंतवणुकीचे आमिष दाखवून सायबर चोरट्यांनी २९ लाख ४० हजार रुपयांची फसवणूक केल्याचा प्रकार उघडकीस आला. याबाबत एकाने कोथरूड पोलीस ठाण्यात फिर्याद दिली आहे. सायबर चोरट्याने तक्रारदाराच्या मोबाइलवर संदेश पाठविला होता. शेअर बाजारात गुंतवणूक केल्यास चांगला परतावा मिळेल, असे आमिष चोरट्याने त्यांना दाखविले. तक्रारदाराला समाज माध्यमातील एका समुहात सहभागी करुन घेतले. परताव्याचे आमिष दाखवून त्याच्याकडून वेळोवेळी पैसे घेतले. तक्रारदाराने चोरट्याच्या बँक खात्यात २९ लाख ४० हजार रुपये जमा केले. चोरट्याने त्याचा मोबाइल क्रमांक बंद केला. फसवणूक झाल्याचे लक्षात आल्यानंतर त्यांनी पोलिसांकडे तक्रार दिली. गुन्हे शाखेचे पोलीस निरीक्षक विक्रमसिंह कदम तपास करत आहेत.
