पुणे : पुणे, पिंपरी-चिंचवड आणि पुणे महानगर प्रदेश विकास प्राधिकरणासाठी (पीएमआरडीए) म्हाडाने (गृहनिर्माण आणि क्षेत्र विकास महामंडळ) सोडत जाहीर केली आहे. त्यानुसार एकूण ६ हजार १६८ घरे उपलब्ध होणार असून त्यासाठी येत्या ३१ ऑक्टोबरपर्यंत ऑनलाइन पद्धतीने अर्ज करता येणार आहेत. दरम्यान, अर्जदारांना आता त्यांच्या जोडीदाराचे आधारकार्ड, पॅनकार्ड डिजी लाॅकवरून प्राप्त करून घेण्याचे बंधनकारक करण्यात आले आहे.

म्हाडाच्या पुणे येथील कार्यालयात हा सोडतीचा शुभारंभ गुरुवारी झाला. त्यावेळी म्हाडाचे पुणे विभागाचे सभापती शिवाजीराव आढळराव पाटील यांनी त्याबाबतची माहिती पत्रकार परिषदेत दिली. म्हाडाच्या पुणे विभागाचे मुख्य अधिकारी राहुल साकोरे यावेळी उपस्थित होते. यंदा सोडतीच्या संगणक प्रणालाीमध्ये पारदर्शकता आणण्यात आल्याचा दावा यावेळी आढळराव पाटील यांनी केला.

यंदा अर्ज भरण्याच्या काही बाबींमध्ये बदल करण्यात आला आहे. त्यानुसार अर्जदार तसेच अर्जदाराच्या जोडीदाराचे आधारकार्ड आणि पॅनकार्ड हे डीजी लॉकर या वरूनच प्राप्त करून घेणे बंधनकारक करण्यात आले आहे. त्यासाठी अर्जदारास डीजी लॉकरवर नोंदणी करून आवश्यक माहिती अद्ययावत करावी लागणार असल्याचे आढळराव पाटील यांनी स्पष्ट केले.

हेही वाचा

ऑनलाइन पदधतीने अर्ज करण्यासाठीची अंतिम मुदत ३१ ऑक्टोबर असून सोडतीसाठीच्या अर्जांची प्रारूप यादी ११ नोव्हेंबर रोजी प्रसिद्ध केली जाणार जाईल. या प्रारूप यादीवर १३ नोव्हेंबर पर्यंत हरकती आणि दावे दाखल करण्यासाठीची मुदत निश्चित करण्यात आली आहे. सोडतीच्या अर्जांची अंतिम यादी १७ नोव्हेंबर रोजी जाहीर केली जाणार असून २१ नोव्हेंबर रोजी सोडत काढली जाणार असल्याचे आढळराव पाटील यांनी सांगितले.

अशी आहेत घरे

– प्रथम येणाऱ्यास प्रथम प्राधान्य योजनेतील सदनिकांची संख्या – १, ६८३

– म्हाडा पीएमएवाय योजनेतील सदनिका – २९९

– १५ टक्के व २० टक्के योजनेतील सदनिकांची एकूण संख्या- ४, १८६

– पुणे महानगरपालिका हद्दीतील सदनिका-१, ५३८

– पिंपरी चिंचवड महानगरपालिका हद्दीतील सदनिका – १,५३४

– पीएमआरडीए हद्दीतील सदनिका- १,११४

म्हाडाच्या घरांच्या सोडतीसाठी ऑनलाईन अर्ज भरण्याकरीता अर्जदारांनी प्रथम http://www.housing.mhada.gov.in या संकेतस्थळवार भेट द्यावी लागणार आहे. तसेच प्रथम येणाऱ्यास प्रथम प्राधान्य तत्वावरील योजनांच्या सदनिकांसाठी ww.bookmayhome.mhada.gov.in तसेच lottery.mhada.gov.in या संकतेस्थळावर भेट द्यावी. – राहुल साकोरे, मुख्य अधिकारी, म्हाडा पुणे विभाग