लोकसत्ता प्रतिनिधी
पुणे: महाराष्ट्र लोकसेवा आयोगातर्फे(एमपीएससी) आज (३० एप्रिल) महाराष्ट्र अराजपत्रित गट ब व गट क सेवा संयुक्त पूर्व परीक्षा २०२३ झाली. ४ लाख ६७ हजार ८५ उमेदवारांना परीक्षेसाठी प्रवेश देण्यात आला, तर साधारणपणे ८० टक्के उमेदवारांची परीक्षेला उपस्थिती होती.
संयुक्त पूर्व परीक्षेसाठी राज्यातील ३७ जिल्हा केंद्रावरील एकूण १ हजार ४७५ परीक्षा उपकेंद्रे निश्चित करण्यात आली होती. या परीक्षेमधून राज्य शासनाच्या विविध विभागातील एकूण ८ हजार १६९ पदांची भरती केली जाणार आहे. आयोगामार्फत जाहिरात प्रसिद्ध केलेली आतापर्यंतची ही सर्वोच्च पदसंख्या आहे. तसेच या परीक्षेसाठी अर्ज सादर करणाऱ्या उमेदवारांची संख्याही आयोगाच्या इतिहासातील सर्वोच्च संख्या आहे. राज्यभरातील केंद्रांवर परीक्षा सुरळीतपणे पार पडल्याची माहिती आयोगाने दिली.
