मावळमध्ये उद्यापासून प्रचाराचा धडाका… कोणत्या नेत्यांच्या सभा होणार?

हेही वाचा >>> लोकसभा निवडणुकीनंतर शरद पवार भाजपसोबत?; वंचित बहुजन आघाडीचे प्रकाश आंबेडकर यांचा दावा 

केंद्रीय रस्ते वाहतूक मंत्री नितीन गडकरी हे मंगळवारी (७ मे) संध्याकाळी सहा वाजता कर्जत तालुक्यातील चौक फाटा मैदानावर जाहीर सभा घेणार आहेत. उपमुख्यमंत्री अजित पवार हे गुरुवारी (९ मे) पिंपरी-चिंचवडमध्ये एक आणि मावळ विधानसभा मतदारसंघात एक अशा दोन सभा घेणार आहेत. निवडणुकीच्या प्रचाराची सांगता शनिवारी (११ मे) पिंपरी-चिंचवडमध्ये मुख्यमंत्री एकनाथ शिंदे यांच्या रोड-शो ने होणार आहे. महायुतीच्या वतीने जोरदार शक्तिप्रदर्शन करण्यात येणार आहे. महाविकास आघाडीचे उमेदवार संजोग वाघेरे यांच्या प्रचारासाठी बुधवारी (८ मे) चिंचवड विधानसभा मतदारसंघातील सांगवी येथील पीडब्ल्यूडी मैदानावर जाहीर सभा होणार आहे. राष्ट्रवादी काँग्रेस शरदचंद्र पवार पक्षाचे अध्यक्ष शरद पवार, शिवसेना उद्धव बाळासाहेब ठाकरे पक्षाचे प्रमुख उद्धव ठाकरे, माजी मुख्यमंत्री पृथ्वीराज चव्हाण, शेतकरी कामगार पक्षाचे सरचिटणीस, आमदार जयंत पाटील, आम आदमी पार्टीचे खासदार संजय सिंह, रिपब्लिकन पार्टी ऑफ इंडियाचे ( ए) अध्यक्ष दीपक निकाळजे सभेला उपस्थित राहणार आहेत. त्यामुळे शहरातील राजकीय वातावरण ढवळून निघणार आहे.