लोकसत्ता प्रतिनिधी
पुणे : वारजे भागात शॉर्टसर्किट होऊन लागलेल्या आगीत वडील आणि मुलाच्या मृत्यू झाल्याची दुर्घटना नुकतीच घडली. दुर्घटनेस जबाबदार असल्याप्रकरणी खोली मालकाविरुद्ध वारजे पोलिसांनी सदोष मनुष्यवधाचा गुन्हा दाखल केला.
याप्रकरणी नितीन नारायण बराटे (वय ४२, रा. हर्षवर्धन बिल्डींग, वारजे गावठाण) याच्याविरुद्ध गुन्हा दाखल करण्यात आला आहे. याबाबत प्रकाश मोहन मुडावत (वय २४, रा. नितीन बराटे चाळ, गोकुळनगर, वारजे माळवाडी ) याने वारजे माळवाडी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, वारजे भागातील गोकुळनगर परिसरात नितीन बराटे याची चाळ आहे. चाळीतील पत्र्याच्या खोलीत प्रकाश मुडावत, त्याचे वडील मोहन आणि मोठा भाऊ पप्पू हे राहायला आहेत. वर्षभरापूर्वी प्रकाशच्या आईचे निधन झाले होते. प्रकाश, मोहन, पप्पू हे मजुरी करुन उदरनिर्वाह करत होते. ९ एप्रिल रोजी पहाटे तीनच्या सुमारास मुडावत राहत असलेल्या पत्र्याच्या खोलीत शॉर्टसर्किट झाले. प्रकास रात्रपाळीत कामाला गेला होता.
शॉर्टसर्किट झाल्यानंतर खोलीत आग लागली. आगीत सिलिंडरने पेट घेतला. सिलिंडरच्या स्फोटामुळे आग भडकली. आगीत प्रकाशचे वडील मोहन आणि भाऊ पप्पू गंभीर होरपळले. त्यांना तातडीने रुग्णालयात दाखल करणात आले. उपचारांपूर्वीच त्यांचा मृत्यू झाला. या घटनेची माहिती मिळताच वारजे पोलीस ठाण्याचे वरिष्ठ पोलीस निरीक्षक विश्वजित काईंगडे यांनी घटनास्थळी भेट दिली.
पोलिसांनी घटनास्थळाची पाहणी केली. तेव्हा शॉर्टसर्किटमुळे आग लागल्याचे उघडकीस आले. पत्र्याच्या खोलीत खिडकी नव्हती, तसेच बाहेर पडण्यासाठी एकच दरवाजा होता. पुरेशी काळजी न घेतल्याने दुर्घटना घडल्याचे निष्पन्न झाल्यानंतर पोलिसांनी याप्रकरणी चाळ मालक नितीन बराटे यांच्याविरुद्ध सदोष मनुष्यवधाचा गु्न्हा दाखल केला. सहायक पोलीस निरीक्षक रणजीत मोहिते तपास करत आहेत.
