जेजुरी पोलिसांच्या सतर्कतेमुळे बालविवाह रोखण्यात यश; पाच जणांविरुद्ध गुन्हा दाखल

जेजुरी : पुरंदर तालुक्यातील गुळुंचे गावात रविवारी दुपारी दीड वाजता बालविवाह सुरू असल्याची माहिती समजताच जेजुरी पोलिसांनी घटनास्थळी जाऊन बालविवाह रोखला. या प्रकरणी पाच जणांविरुद्ध गुन्हा दाखल करण्यात आला आहे. जेजुरी पोलिसांनी दिलेल्या माहितीनुसार, गुळुंचे गावामध्ये बालविवाह होत असल्याची माहिती गावच्या पोलीस पाटलांना समजल्याने त्यांनी जेजुरी पोलीस ठाण्यात याबाबत कळविले होते. पोलीस उपनिरीक्षक सर्जेराव पुजारी यांनी तातडीने घटनास्थळी जाऊन विवाह रोखला. त्यावेळी विवाहाची शेवटची मंगलाष्टका सुरू होती. मात्र, वेळीच पोलीस घटनास्थळी पोहोचल्याने अल्पवयीन मुलीचा होणारा विवाह टळला.