राज्यातील पहिली ते दहावीच्या विद्यार्थ्यांची गणित या विषयातील संपादणूक वाढण्यासाठी विविध प्रयत्न करण्यात येत आहेत. याचाच एक भाग म्हणून राज्य शैक्षणिक संशोधन आणि प्रशिक्षण परिषदेकडून (एससीईआरटी) गणिताचे ई साहित्य विकसित करण्यात येत असून, हे साहित्य दीक्षा ॲप, युट्यूब वाहिनीसह विविध माध्यमांद्वारे उपलब्ध करून देण्यात येईल.
गणिताचे ई साहित्य निर्माण करण्यासाठी शालेय शिक्षण विभागाकडून प्रशासकीय आणि १६.५० लाखांच्या निधी मान्यतेसंदर्भातील शासन निर्णय प्रसिद्ध करण्यात आला. राज्यात दीक्षा ॲपचा वापर अधिक प्रभावी पद्धतीने होण्याच्या दृष्टीने मराठी माध्यमाच्या पहिली ते दहावीच्या विद्यार्थ्यांसाठी गणिताचे ई साहित्य तयार करण्याबाबत एससीईआरटीकडून सादर करण्यात आलेल्या प्रस्तावाला शासनाने मान्यता दिली आहे. या अंतर्गत ई साहित्य निर्मितीसाठी आवश्यक साधनांची खरेदी, व्हिडिओ निर्मिती, भाषांतर अशा खर्चांसाठी निधी मंजूर करण्यात आला.
एससीईआरटीचे उपसंचालक विकास गरड म्हणाले, की राज्यातील पहिली ते दहावीच्या विद्यार्थ्यांना ई साहित्य उपलब्ध करून दिले जाणार आहे. त्यासाठी खान ॲकॅडमीच्या सहाय्याने प्रकल्प राबवण्यात येत आहे. या प्रकल्पाअंतर्गत तयार होणारे ई साहित्य विद्यार्थ्यांना दीक्षा ॲप, एससीईआरटीचे संकेतस्थळ, युट्यूब वाहिनीद्वारे उपलब्ध करून दिले जाईल.
