बारामतीतील हृदयद्रावक घटना : मुलगा आणि दोन नातींच्या अपघाती मृत्यूचा धक्का सहन न झाल्याने ज्येष्ठाचा मृत्यू

अपघात मोरगाव रस्त्यावरील महात्मा फुले चौकात रविवारी सकाळी साडेअकराच्या सुमारास घडला. ओंकार आचार्य हे वैद्यकीय प्रतिनिधी म्हणून काम करत होते. वडिलांसाठी फळे घेण्यासाठी खंडोबानगर येथील चौकात थांबले होते. शाळेतून मुलगी सईला घेऊन परतताना डंपरच्या धडकेत दुचाकीखाली चिरडून तिघांचा जागीच मृत्यू झाला. डंपर चालक दशरथ दत्तात्रय डोळे याला पोलिसांनी अटक केली असून, बारामती शहर पोलीस ठाण्यात गुन्हा दाखल झाला आहे.

राजेंद्र आचार्य हे निवृत्त शिक्षक होते. ते महिनाभर खासगी रुग्णालयात उपचार घेतल्यानंतर दोनच दिवसांपूर्वी घरी परतले होते. मात्र, मुलगा आणि नातींच्या अकाली मृत्यूचा धक्का त्यांना सहन झाला नाही. सोमवारी त्यांचे निधन झाले. आचार्य यांच्यामागे पत्नी शैलजा, मुलगा अमोल आणि सून अरुणा हे आहेत. दरम्यान, बारामतीच्या खासदार सुप्रिया सुळे यांनी या घटनेबद्दल शोक व्यक्त केला आहे.