पुणे : मद्य विक्री करणाऱ्या दुकानातील दरवाज्याचे कुलूप तोडून चोरट्याने गल्ल्यातील १५ हजारांची रोकड लांबविल्याची घटना कल्याणीनगर भागात घडली. चोरट्यांनी मद्याच्या बाटल्या फोडल्याचे उघडकीस आले. याबाबत सचिन अंगदराव मुसळे (वय ३१, रा. आदर्शनगर ) यांनी येरवडा पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, नगर रस्त्यावरील कल्याणीनगर भागात प्रकाश वाईन्स हे मद्य विक्रीचे दुकान आहे. चोरट्यांनी मद्य विक्री दुकानाचा दरवाजा उचकटून आत प्रवेश केला. गल्ल्यातील १५ हजारांची रोकड लांबविली, तसेच चोरट्याने दुकानातील मद्याच्या बाटल्या फोडल्या. या घटनेची माहिती मिळताच पोलिसांनी घटनास्थळी भेट दिली. पोलिसांनी मद्य विक्री दुकानाच्या परिसरातील सीसीटीव्ही चित्रीकरण तपासासाठी ताब्यात घेतले आहे. सहायक पोलीस निरीक्षक नंदनवार तपास करत आहेत.
शहरात घरफोडीच्या घटनांमध्ये वाढ झाली आहे. बंद सदनिकांचे कुलूप तोडून चोरट्यांनी गेल्या साडेतीन वर्षांत तब्बल ७३ कोटी ४० लाख रुपयांचा ऐवज लांबविल्याचे उघडकीस आले आहे. घरफोडीच्या दाखल गुन्ह्यांच्या प्रमाणात गुन्हे उघड होण्याचे प्रमाण तुलनेने कमी असल्याचे निदर्शनास आले आहे.
बारमधून मद्याच्या बाटल्या चोरी
मांजरी रस्त्यावरील एका रेस्टोरंट बारमधील दरवाज्याचे कुलूप तोडून चोरट्याने ३३ हजार रुपयांच्या मद्याच्या बाटल्या, रोकड, तसेच मोबाइल संच लाबंविल्याची घटना घडली. याबाबत लक्ष्मणसिंग चत्तरसिंग तनवर (वय ३६, रा. मांजरी रस्ता) यांनी हडपसर पोलीस ठाण्यात फिर्याद दिली आहे. त्यांनी दिलेल्या फिर्यादीनुसार चोरट्यांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, मांजरी रस्त्यावर नाईकल रेस्टॉरंट बार आहे. चोरट्यांनी ९ जुलै रोजी मध्यरात्री बारच्या दरवाज्याचे कुलूप तोडले. बारमध्ये प्रवेश केल्यानंतर चोरट्याने गल्ल्यातील रोकड लांबविली, तसेच ३३ हजार रुपयांच्या विविध प्रकारच्या मद्याच्या बाटल्या लांबवून चोरटा पसार झाला. पोलीस उपनिरीक्षक मुलाणी तपास करत आहेत.
