पुणे लोकसभा : एमआयएमचा उमेदवार म्हणजे भाजपची ‘बी’ टीम, काँग्रेस पक्षाचे शहराध्यक्ष अरविंद शिंदेंची टीका

त्या पार्श्वभूमीवर काँग्रेस पक्षाचे पुणे शहराध्यक्ष अरविंद शिंदे यांच्याशी संवाद साधला असता ते म्हणाले की, पुणे लोकसभेचे भाजपचे उमेदवार मुरलीधर मोहोळ यांना पराभव दिसत आहे. त्यामुळे आता काही उमेदवार उभे केले जात आहे. त्याच दरम्यान एमआयएमने अनिस सुंडके यांना उमेदवारी दिली आहे. एमआयएम या पक्षाला जो समाज मतदान करतो. त्या समाजातील नागरिकांना मागील काही निवडणुकीतील अनुभव पाहिल्यावर समजले आहे की, एमआयएमला मतदान केल्यावर भाजपचा उमेदवार निवडून येतो. आपल्या मतांचे विभाजन होते. त्यामुळे आजवर एमआयएमला जो समाज मतदान करित आला आहे तो यापुढे मतदान करणार नाही. या निवडणुकीत काँग्रेस पक्षाच्या उमेदवाराला मतदान करेल आणि यंदा मतांचं विभाजन होणार नसल्याचा विश्वास यावेळी त्यांनी व्यक्त केला.

हेही वाचा : ‘आयसर’च्या प्रवेश प्रक्रियेत बदल… आता कशी होणार प्रवेश परीक्षा?

तसेच ते पुढे म्हणाले की, कोणताही राजकीय पक्ष किंवा संघटना असल्यावर काही तरी शहरात काम दिसते. पण मागील दोन वर्षांत किमान पुणे शहरात एमआयएमचे काही तरी काम दिसले असते. मात्र आता निवडणुका आल्यावर ते उमेदवार आणतात. एमआयएमला पुणे शहरात उमेदवार मिळत नाही. त्यामुळे त्यांना बाहेरचा उमेदवार आणावा लागला आहे. त्यामुळे एमआयएमचा उमेदवार म्हणजे भाजपची बी टीम असल्याचे सांगत त्यांनी एमआयएम पक्षाच्या नेतृत्त्वाच्या कार्यपद्धतीवर टीका केली.