चंदननगर भागात मसाज पार्लरच्या नावाखाली वेश्याव्यवसाय, गुन्हे शाखेचा छापा; एकास अटक

राहुल सुनील सिंह (वय २४, रा. समर्थ काॅम्प्लेक्स, मांजरी) असे अटक करण्यात आलेल्याचे नाव आहे. याप्रकरणी सैबू शेख उर्फ सैबू मुबारक अली (रा. श्रीराम सोसायटी, चंदननगर) याच्याविरुद्ध गुन्हा दाखल करण्यात आला आहे. गुन्हे शाखेच्या युनिट पाचमधील पोलीस हवालदार स्वाती तुपे यांनी याबाबत चंदननगर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, नगर रस्त्यावरील चंदननगर भागात एका इमारतीत मसाज पार्लरच्या नावाखाली वेश्याव्यवसाय सुरू असल्याची माहिती गुन्हे शाखेच्या युनिट पाचच्या पथकाला गुरुवारी (३ एप्रिल) मिळाली. त्यानंतर पोलिसांच्या पथकाने तेथे छापा टाकला. पोलिसांनी मसाज पार्लरमधून पाच तरुणींना ताब्यात घेतले.

चौकशीत आरोपी राहुल आणि सैबू यांनी तरुणींना पैशांचे आमिष दाखवून वेश्याव्यवसायास प्रवृत्त केल्याची माहिती मिळाली. पोलिसांनी राहुलला अटक केली. त्याच्याबरोबर असलेल्या साथीदाराविरुद्ध अनैतिक मानवी वाहतूक प्रतिबंधक कायद्यान्वये (पीटा) गुन्हा दाखल करण्यात आला. चंदननगर पोलीस ठाण्याच्या वरिष्ठ पोलीस निरीक्षक सीमा ढाकणे तपास करत आहेत.

शहरात मसाज पार्लरच्या नावाखाली गैरप्रकार सुरू असल्याच्या तक्रारी पोलीस आयुक्त अमितेश कुमार यांच्याकडे करण्यात आल्या होत्या. पोलीस आयुक्तांनी गैरप्रकार करणाऱ्या मसाज पार्लरवर कारवाईचे आदेश दिले होते. गेल्या वर्षी शहर, तसेच उपनगरातील ३५ मसाज पार्लरचालकांविरुद्ध गुन्हे दाखल करुन कारवाई करण्यात आली होती. मसाज पार्लरच्या नावाखाली गैरप्रकार सुरू असल्यास कारवाई करण्याचा इशारा देण्यात आला आहे.