पुणे : देवदर्शनासाठी निघालेल्या दुचाकीस्वार दाम्पत्याला भरधाव ट्रकने धडक दिल्याने सहप्रवासी महिलेचा मृत्यू झाल्याची घटना नगर रस्त्यावरील खराडी भागात घडली. याप्रकरणी ट्रकचालकाविरुद्ध गुन्हा दाखल करण्यात आला. पूनमदेवी शिवनंदन प्रसाद (वय ३५, रा. महावीरनगर, वडगाव शेरी) असे मृत्युमुखी पडलेल्या महिलेचे नाव आहे. याबाबत शिवनंदन प्रसाद (वय ४०) यांनी विमानतळ पोलीस ठाण्यात फिर्याद दिली आहे.
हेही वाचा : पुणे : रिक्षाप्रवासी महिलेच्या पिशवीतून रोकड चोरली, सेनापती बापट रस्त्यावरील घटना
दुचाकीस्वार प्रसाद दाम्पत्य रांजणगाव येथील गणपती मंदिरात दर्शनासाठी निघाले होते. पुणे-नगर रस्त्यावर खराडी भागात शनिवारी (७ ऑक्टोबर) दुपारी बाराच्या सुमारास भरधाव ट्रकने दुचाकीस्वार प्रसाद दाम्पत्याला धडक दिली. अपघातात गंभीर जखमी झालेल्या पूनमदेवी यांचा मृत्यू झाला. दुचाकीस्वार शिवनंदन यांना दुखापत झाली. अपघातानंतर पसार झालेल्या ट्रकचालकाविरुद्ध गुन्हा दाखल करण्यात आला असून, सहायक पोलीस निरीक्षक एस. एस. पाठक तपास करत आहेत.
