नाझरे धरणातील पाणीसाठ्यात वाढ

सासवड ते जेजुरीतील नाझरे धरण हे अंतर सुमारे २० किलोमीटर आहे. यापूर्वी नदीचे पात्र कोरडे पडले होते. आता कऱ्हा नदी वाहत असल्याने नदीच्या पात्राशेजारील पाझर तलाव भरले आहेत.सासवड परिसरात पुरेसा पाऊस झाल्यावर कऱ्हा नदीतून नाझरे धरणात मोठ्या प्रमाणात पाणी येते. त्यानंतर धरण पूर्ण क्षमतेने भरते. जेजुरीत दररोज हजारो भाविक खंडोबाच्या दर्शनासाठी येतात. भाविकांना याच धरणातून पाणीपुरवठा केला जातो. धरणातील पाणीसाठा कमी झाल्यास औद्योगिक वसाहतीलाही अनेक वेळा पाणीटंचाईला तोंड द्यावे लागते. धरणात पाणीसाठा वाढत असल्याने संबंधितांना दिलासा मिळाला आहे.

मागील वर्षी मे महिन्यात नाझरे धरण कोरडे पडले होते, त्यातील गाळही मोठ्या प्रमाणात काढण्यात आला. यंदा धरणात १९५ दशलक्ष घनफूट एवढा मृत पाणीसाठा शिल्लक आहे. आता कऱ्हा नदीचे पाणी नाझरे धरणात पोहोचल्याने पाणीसाठा वाढत आहे. पुरेसा पाऊस झाल्यास धरण लवकर भरण्याची शक्यता आहे.अनिल घोडके, शाखा अभियंता