पुणे : जिल्ह्यात म्हाडाच्या वतीने ३५ हजार घरे बांधण्याचे नियोजन करण्यात आले आहे. त्यानुसार पंधरा हजार घरांसाठी खेड आणि मुळशी तालुक्यातील जमीन उपलब्ध झाली आहे. सरकारी आणि खासगी जागांवर या घरांची उभारणी करण्यात येणार असल्याची माहिती म्हाडा पुणे विभागाचे सभापती शिवाजीराव आढळराव पाटील यांनी दिली.
आढळराव म्हणाले, ‘पुणे शहराजवळील पाबळ (ता. शिरूर) येथे २५ एकर जागा उपलब्ध होणार असून, खराबवाडी (ता. खेड) येथील घरांसाठी आराखडा अंतिम करण्यात आला आहे. शिरूर येथेही ४ एकर जागेत नवीन योजना सुरू करण्यात येणार आहे. खेड तालुक्यातील रोहकल येथे ४० ते ४५ एकर जागा उपलब्ध झाली असून, ९ ते १० हजार घरे तेथे बांधण्यात येतील.
मुळशी तालुक्यातील नेरे येथे ८ ते ९ एकर जागा हाती आली असून, त्या ठिकाणी ५ हजार घरांचे नियोजन आहे. भोर येथे १२ एकर खासगी जागा उपलब्ध असून, बाजारभावाने या जागेची खरेदी करण्याची म्हाडाची तयारी आहे. महापालिका, नगर परिषद आणि नगर पंचायतींच्या हद्दीत परवडणाऱ्या दरात जागा उपलब्ध झाल्यास ती खरेदी करण्यात येईल, असे आढळराव यांनी स्पष्ट केले.
म्हाळुंगे येथील समस्या दूर
म्हाळुंगे येथील म्हाडाच्या योजनेतील घरे पडून आहेत. ‘प्रथम येणाऱ्यास प्रथम प्राधान्य’ ही योजना राबवूनही त्याला प्रतिसाद मिळत नाही. या ठिकाणी असलेल्या रस्त्याची अडचण दूर करण्यात आली आहे. त्यानुसार रस्त्याचे काम येत्या काही दिवसांत सुरू करण्यात येणार आहे. येथील घरांच्या विक्रीसाठी खासगी यंत्रणांची मदत घेण्यात येणार आहे. सध्या या ठिकाणची ५० घरे भाडेतत्त्वावर देण्यात आली आहेत. तर ताथवडे येथील जागेवरील पहिल्या टप्प्यामधील ६८९ घरांपैकी २८ घरे अद्याप शिल्लक आहेत. तर फेज दोनमधील ७९२ घरांच्या विक्रीची प्रक्रिया सुरू आहे. याची किंमत ७४ लाखांवरून ६८ लाख करण्यात आली आहे.
