पुणे : बिबवेवाडीत अल्पवयीनांनी कोयते उगारून वाहनांची तोडफोड केल्याची घटना शुक्रवारी रात्री घडली. याप्रकरणी पोलिसांनी सात अल्पवयीनांना ताब्यात घेतले आहे. तोडफोड प्रकरणात दोघांना अटक करण्यात आली आहे. गणेश कोळी (वय २०) आविष्कार भालेराव (वय २०, दोघे रा. रा. नवीन पद्मवतीनगर, बिबवेवाडी) अशी अटक करण्यात आलेल्यांची नावे आहे.
पोलिसांनी दिलेल्या माहितीनुसार, आरोपी गणेश याचा पद्मावतीनगर भागात काहीजणांशी वाद झाला होता. वादावादीतून त्याला मारहाण करण्यात आली होती. मारहाणीचा बदला घेण्यासाठी गणेश,अविष्कार आणि अल्पवयीन मुले शुक्रवारी रात्री पद्मावतीनगर येथे कोयता आणि लाकडी दांडके घेऊन गेले होते. गणेशला मारहाण करणारे दिसले नाहीत. त्यानंतर तेथून जाताना आरोपींनी रस्त्यात उभ्या असलेल्या वाहनांच्या काचा कोयते आणि दांडक्याने फोडल्या. कोयते उगारून त्यांनी परिसरातील नागरिकांना शिवीगाळ केली. आरोपींनी रिक्षासह दुचाकींची तोडफोड केली.
तोडफोडीचा आवाज ऐकून या भागातील रहिवासी घराबाहेर पडले. तेव्हा आरोपींनी त्यांना कोयते आणि दांडक्याचा धाक दाखविला. रहिवाशांनी तोडफोडीचे चित्रीकरण मोबाइल कॅमेऱ्याने केले. या घटनेची माहिती मिळताच गुन्हे शाखा आणि बिबवेवाडी पोलिसांचे घटनास्थळी दाखल झाले. पसार झालेल्या सात अल्पवयीनांसह नऊ जणांना पोलिसांनी ताब्यात घेतले. आरोपींविरुद्ध यापूर्वी गुन्ह्यांची नोंद झाली नाही, तोडफोड करणारे मुले १२ ते १७ वयोगटातील आहेत. वरिष्ठ पोलीस निरीक्षक शंकर साळुंखे यांच्या मार्गदर्शनाखाली सहायक निरीक्षक असोक येवले तपास करत आहेत.
बिबवेवाडीत तोडफोडीची दुसरी घटना
गेल्या वर्षी बिबवेवाडी भागात टोळक्याने ४० वाहनांची तोडफोड केली होती. या घटनेनंतर खून प्रकरणात जामीन मिळवून बाहेर पडलेल्या सराइतावर पिस्तुलातून गोळीबार करण्यात आल्याची घटना घडली होती. बिबवेवाडी भागातील वाढत्या गुन्हेगारी घटनांमुळे या भागातील रहिवासी दहशतीखाली आहेत.
