पिंपरी : पिंपरी-चिंचवड शहरात सात लाख ३१ हजार मालमत्तांची नोंदणी आहे. त्यापैकी आतापर्यंत चार लाख २६ हजार मालमत्ताधारकांनी चालू वर्षातील मालमत्ता कराचा भरणा केला आहे. तर, आतापर्यंत ३४ हजार २२ मालमत्ताधारकांनी एकदाही महापालिकेचा कर भरला नसल्याचे समोर आले आहे. या मालमत्ताधारकांवर कठोर कारवाई करणार असल्याचे कर आकारणी व कर संकलन विभागाने सांगितले.
महापालिकेने पहिल्या तिमाहीत ५२२ कोटी रुपयांचा कर वसूल केला. चालू आर्थिक वर्षात कर संकलन विभागाने १३०० कोटींचे उद्दिष्ट ठेवले आहे. यासाठी १८ विभागीय कार्यालयांमार्फत कर संकलनाचे कामकाज सुरू आहे. थकबाकी असलेल्या निवासी, बिगरनिवासी मालमत्ताधारकांवर कठोर कारवाईस सुरुवात करण्यात येणार आहे. शहरात ५० हजारांपेक्षा अधिक थकबाकी असणाऱ्यांची मालमत्तांची संख्या २८ हजार ५१८ आहे. नऊ हजार १४७ मालमत्ताधारकांकडे एक लाखाहून अधिक थकबाकी आहे. तर, पाच लाखांपेक्षा अधिक थकबाकी असणाऱ्या व्यावसायिक मालमत्तांची संख्या ८७५ आहे. मालमत्ता कराच्या देयकांसोबत थकबाकीदारांना नोटिसा बजावण्यात आल्या आहेत. नोटीस देऊनही वारंवार मालमत्ता कर भरण्यास टाळाटाळ करणाऱ्यांवर कारवाई केली जाणार आहे. कर न भरल्यास मालमत्ता जप्त करण्यात येणार असल्याचे सहायक आयुक्त अविनाश शिंदे यांनी सांगितले. ३० सप्टेंबर २०२५ पर्यंत ऑनलाइन कर भरल्यास मालमत्ताधारकांना सामान्य करावर चार टक्के सवलत देण्यात येणार असल्याचेही त्यांनी सांगितले.
मोटार, टीव्ही, फ्रिज जप्त करणार
शहरातील थकीत एक लाख १२ हजार ८०९ निवासी मालमत्ताधारकांकडे ३१० कोटींचा कर थकीत आहे. ज्या निवासी मालमत्ताधारकांकडे पाच किंवा १० वर्षांपेक्षा अधिक काळापासून थकबाकी आहे, अशा निवासी मालमत्तांची जंगम मालमत्ता म्हणजे मोटार, टीव्ही, फ्रिज व घरातील महागड्या वस्तू जप्त करण्यात येणार आहेत.
शहरातील ३४ हजार २२ मालमत्ताधारकांनी एकदाही महापालिकेचा कर भरला नाही. अशा थकबाकीदारांवर आता कठोर कारवाई केली जाणार आहे. – प्रदीप जांभळे-पाटील, अतिरिक्त आयुक्त, पिंपरी-चिंचवड महापालिका.
