लोकसत्ता प्रतिनिधी
पुणे : राज्यातील बदलत्या सत्ता समीकरणांच्या पार्श्वभूमीवर शहरातील पोलीस बंदोबस्तात वाढ करण्यात आली आहे. राष्ट्रवादी काँग्रेसचे पक्ष कार्यालयासह, पदाधिकाऱ्यांचे कार्यालय आणि निवासस्थानांच्या परिसरात पोलिसांनी बंदोबस्त ठेवला आहे.
राष्ट्रवादीचे नेते अजित पवार यांनी आमदारांसह शिंदे-फडणवीस सरकारशी हातमिळवणी केली. उपमुख्यमंत्री अजित पवार यांची पदभार स्विकारला. राष्ट्रवादीत प्रमुख नेत्यांची मंत्री मंडळात वर्णी लागली. राजकीय सत्तासंघर्षामुळे शहरातील बंदोबस्तात वाढ करण्यात आली. राष्ट्रवादी काँग्रेसचे सर्वेसर्वो ज्येष्ठ नेते शरद पवार यांच्या गणेशखिंड रस्त्यावरील मोदीबाग परिसरातील निवासस्थान परिसरात पोलिसांनी बंदोबस्त वाढविला. शिवाजीनगर डेंगळे पूल परिसरातील राष्ट्रवादी काँग्रेसचे शहर कार्यालयाच्या परिसरात बंदोबस्त ठेवण्यात आला आहे.
आणखी वाचा-पुण्यात उद्या उपमुख्यमंत्री अजित पवार यांच्या अध्यक्षतेखाली होणारा गुरूजन गौरव सोहळा कार्यक्रम रद्द
अजित पवार यांचे समर्थक आमदार, पदाधिकारी, त्यांचे कार्यालय आणि निवासस्थान परिसरात पोलिसांनी बंदोबस्त ठेवला आहे. पोलीस आयुक्त रितेश कुमार, सहपोलीस आयुक्त संदीप कर्णिक यांनी बंदोबस्तात वाढ करण्याचे आदेश दिले. राजकीय घडामोडींच्या पार्श्वभूमीवर शहरातील बंदोबस्तात वाढ करण्यात आली आहे. राष्ट्रवादी काँग्रेसचे पदाधिकारी, कार्यालयांच्या परिसरात बंदोबस्त ठेवण्यात आला आहे, असे सहपोलीस आयुक्त संदीप कर्णिक यांनी सांगितले.
