पुणे : दारू पिताना झालेल्या वादातून तरुणावर धारदार शस्त्राने वार करून खुनाचा प्रयत्न केला. त्यानंतर आजूबाजूच्या नागरिकांना शस्त्राचा धाक दाखवत धमकावल्याची घटना ७ मे रोजी आंबेगावातील आमराईत घडली. हल्ल्यात आलोक कोंढरे असे गंभीर जखमी झालेल्याचे नाव आहे. गणेश कदम, अनिकेत सांडे, ऋषी सावंत आणि पुनीत वाघामरे (सर्व रा. भारती विद्यापीठ) यांच्यावर खुनाच्या प्रयत्नाचा आणि दहशत माजविण्याचा गुन्हा दाखल करण्यात आला आहे. याप्रकरणी ओंकार वडमारे याने भारती विद्यापीठ पोलीस ठाण्यात फिर्याद दाखल केली आहे.
पोलिसांनी दिलेल्या माहितीनुसार, फिर्यादी ओंकार हा डिलेव्हरी बॉय असून, बुधवारी दुपारी मित्र अलोक कोंढरे, किरण घोडके, सोमनाथ जगदाळे आणि इतर काही मित्रांसोबत दारू पिण्यास बसला होता. त्यावेळी आरोपी त्यांच्याजवळ येऊन दारू पित बसले. यावेळी आलोक कोंढरे आणि आरोपी गणेश कदम यांच्यात शाब्दिक वादावादी झाली. यानंतर गणेश कदम तेथून निघून गेला आणि थोड्या वेळानंतर तो साथीदारांसह माघारी आला. त्याने आलोक कदमचा पाठलाग करून आंबेगाव घबाडी येथील उत्कर्ष शाळेजवळ त्याला गाठले. आरोपी गणेशने कोयत्याने तर ऋषिकेशने तलवारीने आलोकवर वार केले. त्यानंतर जाताना नागरिकांना शस्त्रे दाखवत दमदाटी केली. आरोपींनी एका मोटारीची तोडफोड केली आहे. सहायक पोलीस निरीक्षक मिथुन परदेशी या प्रकरणाचा तपास करत आहेत.
