पुणे : चारित्र्याच्या संशयावरुन डोक्यात कोयता घालून केली पत्नीची हत्या

पोलिसांनी दिलेल्या माहितीनुसार, हिंजवडी पोलीस ठाण्याच्या हद्दीतील पुनावळे येथे राहत्या घरासमोर राहुलने पत्नी गौरीच्या डोक्यात वार करून तिचा खून केला. आरोपी राहुल हा सुरक्षा रक्षकाची नोकरी करतो. साडेतीन वर्षांपूर्वी गौरी आणि राहुलचा विवाह झाला होता. संसार सुखाचा चालत असताना दोघांमध्ये एका शुल्लक कारणावरुन भांडण झाले. त्यामुळं गौरी माहेरी निघून गेली होती. त्यानंतर राहुलच्या डोक्यात तिच्याविषयी संशयाच भूत शिरलं होतं.

राहुल हळूहळू गौरीच्या चारित्र्यावर संशय घेऊ लागला. गौरीला समजावून पुन्हा नांदायला घेऊन आला. परंतु, संशय राहुलला शांत बसू देत नव्हता. मंगळवारी रात्री साडेनऊच्या सुमारास पत्नी गौरी आणि राहुलचे घरासमोरील रस्त्यावर भांडण झालं. आधीच राग डोक्यात असलेल्या राहुलने कोयता घेऊन पत्नीच्या डोक्यात वार केले यात तिचा मृत्यू झाला. दोघांना अपत्य नव्हते, अशी माहिती हिंजवडी पोलिसांनी दिलीय. घटनेचा अधिक तपास पोलीस उपनिरीक्षक महेंद्र गाढवे करत आहेत.