पुण्याच्या मावळमध्ये फिल्मीस्टाईलने बालगुन्हेगाराची हत्या; थरार सीसीटीव्हीत कैद

याप्रकरणी संशयित आरोपी किशोर पानसरे आणि त्याच्या साथीदारांचा शोध सुरू आहे. पोलिसांनी दिलेल्या माहितीनुसार,मयत रोशन हिंगे (१७) राहणारा इंदोरी मावळ,आणि त्याचा मित्र हा सकाळी नऊच्या सुमारास दुचाकीवरून चाकण तळेगाव मार्गावरून जात होते तर सहा आरोपी त्यांचा फिल्मी स्टाईलने मोटारीतून पाठलाग करत होते. माळवाडी येथे आल्यानंतर रोशनच्या दुचाकीला पाठीमागून जोरात धडक देण्यात आली.त्यामुळे तो आणि त्याचा मित्र दुचाकीवरून खाली पडले.

आरोपी मोटारीतून खाली उतरले आणि त्यांचा पाठलाग सुरू केला. रोशन हा जीव वाचवण्यासाठी लोकवस्तीच्या दिशेने धावत होता.अखेर एकाच्या घरासमोर आल्यानंतर त्याला आरोपीने गाठले आणि त्याच्यावर सहा जणांनी धारदार शस्त्राने सपासप वार केले. यात रोशनचा जागीच मृत्यू झाला. ही हत्या पूर्ववैमनस्यातून झाल्याची प्राथमिक माहिती पोलिसांनी दिली आहे. विशेष म्हणजे रोशन हा जी.टी.टोळीचा सदस्य आहे. याच टोळीने संशयित आरोपी किशोर पानसरे याच्या सख्ख्या भावाची हत्या केली होती, रोशन हा बालगुन्हेगार आहे. पसार झालेल्या आरोपींचा पोलीस शोध घेत आहेत. अधिक तपास पोलीस निरीक्षक विक्रांत पासलकर करत आहेत.