शाहू मोडक स्मृती पुरस्कार प्रदान तालावर पकड असलेले सोहम गोराणे याचे तबलावादन.. जिया वाडकरच्या सुरेल स्वरातील ‘चंदा चमके चमचम’ हे गीत.. व्यंकटेश माडगूळकर यांच्या ‘करुणाष्टक’मधील एका उताऱ्याचे, ‘एलिझाबेथ एकादशी’फेम श्रीरंग महाजन याने अभिनयासह केलेले सादरीकरण.. दृष्टिहीनांच्या विश्वचषक स्पर्धेत भारताचे प्रतिनिधित्व करीत दक्षिण आफ्रिकेमध्ये उत्तम खेळाचे दर्शन घडविणारा अमोल करचे याने सांगितलेल्या आठवणी.. ज्ञानेश्वर आणि श्रीकृष्णाच्या भूमिकेमुळे अजरामर झालेले शाहू मोडक यांच्या जागविलेल्या स्मृती.. घनगंभीर आवाजाची प्रचिती देत सुरेश वाडकर यांनी गायलेले ‘ऐजिंदगी गले लगा ले’.. अशा प्रफुल्लित वातावरणात शाहू मोडक स्मृती पुरस्कार प्रदान कार्यक्रम मंगळवारी रंगला. शाहू मोडक स्मृती प्रतिष्ठानतर्फे शाहू मोडक यांच्या जन्मदिनानिमित्त माजी केंद्रीय गृहमंत्री सुशीलकुमार शिंदे यांच्या हस्ते श्रीरंग महाजन, जिया वाडकर, सोहम गोराणे, अमोल करचे आणि ज्योतिषी दत्तात्रय विघ्नहर अत्रे यांना शाहू मोडक स्मृती पुरस्कार प्रदान करण्यात आला. माजी कसोटीपटू चंदू बोर्डे आणि प्रसिद्ध पाश्र्वगायक सुरेश वाडकर यांच्यासह प्रतिभा शाहू मोडक या वेळी उपस्थित होत्या. या कार्यक्रमाला मी उपस्थित राहावे यासाठी अनेक वर्षे प्रयत्न सुरू होते, पण आता सत्ता गेल्यानंतर हा योग जुळून आला, अशी नर्मविनोदी कोटी करीत शिंदे यांनी हरिद्वारला एका साधूकडे श्रीकृष्ण म्हणून शाहू मोडक यांचेच छायाचित्र होते, ही आठवण सांगितली. कलाकारांमधील देवमाणूस अशा शब्दांत मोडक यांचा गौरव करून ही मुले म्हणजे सुगंधी फुले असल्याचे शिंदे यांनी सांगितले. अंधश्रद्धा पसरविण्याचे काम श्रद्धेने केले जात असताना मोडक यांनी भविष्यकथन हे केवळ सूचना देण्यासाठी असल्याचे सांगितले होते. सध्या संगणकावर कुंडली केली जात असून विज्ञानाने भविष्यालाही कवेत घेतले आहे, अशी टिप्पणी शिंदे यांनी केली. सगळे मिळवून झाले असल्याने मी भविष्याच्या नादी लागत नाही, असेही त्यांनी सांगितले. आमच्या दोघांच्याही डोक्यावर भरपूर केस होते तेव्हापासून शिंदेसाहेबांशी दोस्ती असल्याचे वाडकर यांनी सांगताच सभागृह हास्यकल्लोळात बुडाले. पुणेकर चोखंदळ गाणं ऐकणारे असल्याने जिया भविष्यात उत्तम गाईल, असा आशीर्वाद पुणेकरांनी द्यावा, अशी अपेक्षा वाडकर यांनी व्यक्त केली. कसोटी खेळलो असल्याने सरळ बॅटनेच खेळण्याचा प्रयत्न केला. आता सरळपणानेच बोलेन, असे सांगत बोर्डे यांनी मोडक यांच्या आठवणींना उजाळा दिला. प्रतिभा शाहू मोडक यांनी प्रास्ताविक केले. सुधीर गाडगीळ यांनी सूत्रसंचालन केले.
