शिवसेनेत संघटनात्मक फेरबदल; पिंपरी महानगर प्रमुखपदी वाबळे

पिंपरी-चिंचवडमध्ये शिवसेनेत महानगर प्रमुखपद अस्तित्वात नव्हते. शिवसेना (शिंदे) पक्षाने नव्याने या पदाची निर्मिती केली आहे. उपजिल्हाप्रमुख असलेले संत तुकारामनगर येथील राजेश वाबळे यांची त्यावर नियुक्ती केली आहे. जिल्हाप्रमुख असलेल्या बाळासाहेब वाल्हेकर यांच्याकडे पिंपरी, चिंचवड आणि मावळ विधानसभा मतदारसंघांच्या समन्वयकपदाची जबाबदारी सोपविली आहे. मावळ तालुकाप्रमुख असलेले राजेश खांडभोर यांच्याकडे जिल्हाप्रमुखपदाची जबाबदारी दिली आहे. पिंपरी, चिंचवड आणि मावळ विधानसभा मतदारसंघाच्या जिल्हा संघटकपदी शिला भोंडवे आणि मावळ तालुकाप्रमुखपदी राम सावंत यांची नियुक्ती करण्यात आली आहे. या नियुक्त्या एक वर्षासाठी असणार आहेत.

‘पुणे जिल्ह्यातील स्थानिक स्वराज्य संस्थांच्या निवडणुका शिवसेना पूर्ण ताकदीने लढणार आहे. त्या दृष्टीने संघटनाबांधणी, नियोजन सुरू आहे. या निवडणुकांच्या पार्श्वभूमीवर संघटनेत बदल करण्यात आले आहेत. नवीन पदाधिकाऱ्यांच्या मार्गदर्शनाखाली मावळ लोकसभा मतदारसंघात संघटना आणखी मजबूत होईल,’ असा विश्वास खासदार श्रीरंग बारणे यांनी व्यक्त केला.