पिंपरी : चिंचवड येथील श्री मोरया गोसावी महाराज यांच्या द्वारयात्रेला उद्यापासून (शुक्रवार) प्रारंभ होणार आहे. श्रावण शुद्ध प्रतिपदेपासून ते चतुर्थीपर्यंत चार दिवस चालणाऱ्या या धार्मिक यात्रेचा प्रारंभ श्री मोरया गोसावी महाराजांच्या संजीवन समाधी मंदिरातून दररोज सकाळी नऊ वाजता होईल.
याबाबतची माहिती चिंचवड देवस्थान ट्रस्टचे मुख्य विश्वस्त मंदार देव महाराज यांनी दिली. या द्वारयात्रेची परंपरा अनेक दशकांपासून चालू असून, श्रीमोरया गोसावी महाराजांच्या संजीवन समाधी मंदिरातून यात्रेला दररोज सकाळी नऊ वाजता शुभारंभ होतो. यात्रेच्या सुरुवातीला श्री चिंतामणी महाराज यांच्या समाधीस्थळी धूपारती होईल. त्यानंतर सुमारे १०० ते १५० भाविकांचा वाजतगाजत यात्रेचा समुदाय श्री मंगलमूर्ती वाड्यातून मार्गस्थ होईल.
या यात्रेदरम्यान चारही दिशांना असलेल्या द्वारदेवींच्या मंदिरांना भेट दिली जाते. प्रत्येक ठिकाणी पूजन, गोंधळ, जोगवा व धार्मिक स्तोत्रांचे गायन होते. या आध्यात्मिक वातावरणात श्रद्धेने न्हालेल्या भाविकांचा सहभाग लक्षणीय असतो. यात्रेच्या दररोजच्या सांगतेनंतर देवस्थान ट्रस्टतर्फे महाप्रसाद वाटप करण्यात येतो. नागरिकांनी यात्रेमध्ये सहभागी होण्याचे आवाहन चिंचवड देवस्थान ट्रस्टने केले आहे. यात्रेच्या आयोजनासाठी सुरक्षा, वाहतूक व सुविधा यांची पूर्ण तयारी करण्यात आल्याची माहिती मंदार देव महाराज यांनी दिली. या चारही दिवशी शहरात धार्मिक व आध्यात्मिक वातावरण निर्माण होणार असून, शेकडो भाविक यात्रेत सहभागी होऊन भक्तिभाव व्यक्त करणार असल्याचेही त्यांनी सांगितले.
द्वारयात्रेचे कार्यक्रम
२५ जुलै – पूर्वद्वार – श्री मांजराई देवी मंदिर, एम्पायर इस्टेट सोसायटी, चिंचवड
२६ जुलै – दक्षिणद्वार – श्री आसराई देवी मंदिर, वाकड
२७ जुलै – पश्चिमद्वार – श्री ओझराई देवी मंदिर, रावेत
२८ जुलै – उत्तरद्वार – श्री मुक्ताई देवी मंदिर व श्री खंडोबा मंदिर, आकुर्डी
द्वारयात्रा ही परंपरा केवळ एक धार्मिक विधी नसून, चिंचवडच्या आध्यात्मिक वारशाचे प्रतीक आहे. प्रत्येक वर्षी यात्रेत नागरिकांचा वाढता सहभाग ही श्रद्धेची साक्ष आहे, असे चिंचवड देवस्थान ट्रस्टचे मुख्य विश्वस्त मंदार देव महाराज म्हणाले.
