पुणे : अमली पदार्थ विकणाऱ्यास दीड वर्षांनी पकडले

सागर मोहन जाधव (वय २७, रा. केसनंद रस्ता, वाघोली, सध्या रा. मांजरी) असे अटक करण्यात आलेल्याचे नाव आहे. पुणे शहरात गांजा विक्री प्रकरणात जाधव मुख्य सूत्रधार आहे. या पूर्वी त्याच्या विरोधात गुन्हे दाखल करण्यात आले होते. तो परराज्यातून गांजा विक्रीस आणत होता. गुन्हा दाखल झाल्यानंतर तो पसार झाला होता. गेले दीड वर्ष तो पोलिसांना गुंगारा देत होता. तो मांजरी भागातील एका सोसायटीत राहत असल्याची माहिती मिळाल्यानंतर पोलिसांच्या पथकाने त्याला सापळा लावून पकडले.

सहायक आयुक्त गजानन टोम्पे यांच्या मार्गदर्शनाखाली वरिष्ठ पोलीस निरीक्षक विनायक गायकवाड, सहायक निरीक्षक लक्ष्मण ढेंगळे, शैलजा जानकर, सुजीत वाडेकर, योगेश मोहिते, मारुती पारधी, मनोज साळुंके, विशाल दळवी आदींनी ही कारवाई केली.