टेकड्यांवरील सुरक्षिततेचा प्रश्न पुन्हा ऐरणीवर

बाणेर टेकडीवर फिरायला आलेल्या कोरियातील अभियंता तरुणाला चोरट्यांनी लुटल्याची गेल्या शनिवारी (१७ मे) घटना घडली. त्यानंतर तळजाई टेकडीवर १७ वर्षीय युवकाला लुबाडल्याचा प्रकार उघडकीस आला आहे. संबंधित युवकाने सहकारनगर पोलीस ठाण्यात फिर्याद दिली आहे. याप्रकरणी दोन चोरट्यांविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, तक्रारदार युवक अरण्येश्वर भागात राहायला आहे. तो सोमवारी (२० मे) सकाळी सातच्या सुमारास तळजाई टेकडीवर फिरायला गेला होता. तळजाई माता मंदिरापासून तो पायवाटेने निघाला होता. त्या वेळी दोन चोरट्यांनी त्याला अडवून धमकावले. तीक्ष्ण शस्त्राचा धाक दाखवून चोरट्यांनी त्याच्या गळ्यातील दीड लाखांची सोनसाखळी हिसकावून नेली. घाबरलेल्या युवकाने सहकारनगर पोलीस ठाण्यात धाव घेऊन तक्रार दिली. युवकाने दिलेल्या वर्णनानुसार पसार झालेल्या चोरट्यांचा माग काढण्यात येत असून, सहायक पोलीस निरीक्षक सागर पाटील तपास करत आहेत.

सुरक्षिततेच्या उपाययोजनांची अंमलबजावणी कधी?

बाणेर टेकडी, हनुमान टेकडीवर फिरायला आलेल्या नागरिकांना लुटण्याच्या घटना गेल्या वर्षी घडल्या होत्या. त्यानंतर बोपदेव घाटात एका महाविद्यालयीन तरुणीवर सामूहिक बलात्काराची घटना घडली होती. टेकड्यांच्या परिसरात घडणाऱ्या गंभीर गुन्ह्यांच्या पार्श्वभूमीवर मुख्यमंत्री देवेंद्र फडणवीस यांनी निधी मंजूर केला होता. या निधीतून टेकड्यांच्या परिसरात सीसीटीव्ही कॅमेरे बसविण्याचे काम हाती घेण्यात आले आहे. टेकड्यांच्या परिसरात नियमित गस्त घालण्याच्या सूचना पोलीस आयुक्त अमितेश कुमार यांनी दिल्या आहेत. टेकड्यांच्या परिसरात पॅनिक बटण यंत्रणा बसविण्यात येणार आहे. मात्र, अद्याप सुरक्षिततेच्या उपाययोजनांची अंमलबजावणी झाली नसल्याचे निदर्शनास आले आहे.