हिंजवडीत उसाच्या शेतात बिबटय़ाचे तीन बछडे

पिंपरी: आयटी हब अशी ओळख असलेल्या हिंजवडीलगत नेरे गावातील उसाच्या शेतात बिबटय़ाचे तीन बछडे आढळून आले आहेत. स्थानिक शेतकऱ्यांनी याबाबतची माहिती वन अधिकाऱ्यांना कळवली व त्यानंतर वन विभागाने बछडय़ांना ताब्यात घेतले आहे. नेरे गावातील मोहन जाधव यांच्या शेतातील ऊस तोडणीचे काम सुरू आहे. सोमवारी सकाळी साडेसातच्या सुमारास ऊस तोडणाऱ्या कामगारांना शेतात बिबटय़ाचे तीन बछडे असल्याचे दिसून आले. त्यांनी तत्काळ जाधव यांना ही माहिती कळवली. जाधव यांनी वन विभागाला कळवले. तासाभराने वन विभागाचे पथक घटनास्थळी दाखल झाले व त्यांनी बछडे ताब्यात घेतले. या वेळी बघ्यांची मोठय़ा प्रमाणात गर्दी झाली होती. वन विभागाच्या वतीने पुढील कार्यवाही सुरू असल्याचे सांगण्यात आले.