पुण्यात किरकोळ वादातून चारचाकी आणि दुचाकींची तोडफोड

पोलिसांनी दिलेल्या माहितीनुसार, रात्री पावणे दहाच्या सुमारास दुचाकीवरुन जाणाऱ्या मुलांनी वेताळ महाराज वसाहतीत राहणाऱ्या एका तरुणाला दुचाकीने कट मारला. त्यामुळे या तरुणाने चिडून त्यांना हटकले. त्यानंतर दुचाकीवरील मुलांनी तरुणाला दमदाटी करत, मी कोण आहे तुला माहित आहे का?, असे म्हणत १० ते १२ साथीदारांना आणले आणि तरुणाला मारहाण केली.

तरुणाला मारहाण केल्यानंतर १० ते १२ जणांच्या टोळक्याने धुडगूस घालत ३ कोयते आणि २ लाकडी दांडक्यांनी परिसरातील चारचाकी आणि दुचाकी गाड्यांची तोडफोड केली. या प्रकरणी सांगवी पोलिसांनी दोघांना ताब्यात घेतले असून त्यातील एक जण अल्पवयीन आहे. सांगवी पोलीस या प्रकरणाचा पुढील तपास करत आहेत.