दुचाकीस्वारांना खूशखबर

पुणेकर दुचाकीस्वारांना वाहतूक पोलिसांनी खूशखबर दिली असून डेक्कन जिमखाना भागातील दुचाकीस्वारांसाठी बंद ठेवण्यात आलेला संभाजी पूल (लकडी पूल) कायमस्वरूपी खुला करण्याचा निर्णय वाहतूक पोलिसांनी घेतला आहे. त्यानुसार या पुलावरून दुचाकी वाहनांची वाहतूक बुधवारपासून सुरू झाली.

डेक्कन जिमखाना भागातील खंडोजीबाबा चौक ते टिळक चौक दरम्यान असलेला संभाजी पूल १९९४ पासून दुचाकीस्वारांसाठी सकाळी आठ ते रात्री साडेनऊ या वेळेत बंद ठेवला जात होता. हा पूल मोटार, पीएमपीच्या गाडय़ा तसेच रिक्षाचालकांसाठी खुला ठेवण्यात आला होता. वाहतूक पोलिसांनी नुकत्याच केलेल्या पाहणीत संभाजी पूल दुचाकींसाठी बंद ठेवण्यात आल्यानंतर त्याचा ताण डेक्कन भागातील वाहतुकीवर पडत असल्याचे निदर्शनास आले होते. त्यामुळे या भागातील वाहतूक सुरळीत करण्यासाठी संभाजी पूल पुन्हा दुचाकीस्वारांसाठी खुला करण्याचा निर्णय घेण्यात आला.

मध्यंतरी खडकवासला धरणसाखळीत झालेल्या मुसळधार पावसामुळे बाबा भिडे पूल पाण्याखाली गेला होता. भिडे पूल पाण्याखाली गेल्यानंतर वाहतूक पोलिसांनी डेक्कन भागातील वाहतूक सुरळीत ठेवण्यासाठी संभाजी पूल दुचाकीस्वारांसाठी खुला करून देण्याचा निर्णय घेतला होता. संभाजी पूल पुन्हा दुचाकीस्वारांसाठी खुला करून देण्याचे परिपत्रक वाहतूक पोलिसांनी काढले आहे.

संभाजी पूल दुचाकीस्वारांसाठी जाळे

संभाजी पूल सकाळी आठ ते रात्री साडेनऊ या वेळेत दुचाकीस्वारांसाठी बंद ठेवला जात होता. रात्री साडेनऊनंतर पूल दुचाकीस्वारांसाठी खुला व्हायचा. मात्र, परगावाहून येणाऱ्या दुचाकीस्वारांना या नियमाची माहिती नसल्याने नियमभंग करणारे दुचाकीस्वार अलगद पुलाच्या दोन्ही बाजूला थांबलेल्या वाहतूक पोलिसांच्या जाळ्यात सापडायचे.

संभाजी पूल दुचाकीस्वारांसाठी कायमस्वरूपी खुला करून देण्याचा निर्णय वाहतूक पोलिसांनी घेतला आहे. डेक्कन भागातील वाहतुकीचा ताण कमी करण्यासाठी र्निबध हटविण्यात आले आहेत. याबाबतचे परिपत्रक ७ ऑक्टोबर रोजी प्रसिद्ध करण्यात आले आहे. – पंकज देशमुख, पोलीस उपायुक्त, वाहतूक शाखा