पुणे : शेअर बाजारात गुंतवणुकीच्या आमिषाने सायबर चोरांनी कोथरूड भागातील दोन महिलांची ४४ लाख रुपयांची फसवणूक केल्याचा प्रकार उघडकीस आला आहे. याप्रकरणी कोथरूड पोलीस ठाण्यात सायबर चोरट्यांविरुद्ध दोन स्वतंत्र गुन्हे दाखल करण्यात आले आहेत.
याबाबत एका महिलेने कोथरूड पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार महिलेच्या मोबाइल क्रमांकावर मार्च महिन्यात सायबर चोरांनी संदेश पाठविला होता. शेअर बाजारात गुंतवणूक केल्यास चांगला परतावा मिळेल, असे आमिष चोरांनी त्यांना दाखविले होते. महिलेने सुरुवातीला काही रक्कम चोरांच्या बँक खात्यात जमा केली. गुंतवणूक केल्यानंतर महिलेला परतावा देण्यात आला. परतावा मिळाल्याने महिलेचा विश्वास बसला. त्यानंतर महिलेने चोरांच्या बँक खात्यात वेळोवेळी ३३ लाख ४९ हजार रुपये गुंतविले. रक्कम गुंतविल्यानंतर चोरांनी त्यांना परतावा दिला नाही. फसवणूक झाल्याचे लक्षात आल्यानंतर महिलेने नुकतीच पोलिसांकडे तक्रार दिली.
दुसऱ्या एका घटनेत सायबर चोरांनी कोथरूड भागातील आणखी एका महिलेची शेअर बाजारात गुंतवणुकीच्या आमिषाने १० लाख ६० हजार रुपयांची फसवणूक केल्याचा प्रकार उघडकीस आला आहे. याबाबत एका महिलेने कोथरूड पोलीस ठाण्यात फिर्याद दिली आहे. गुन्हे शाखेचे पोलीस निरीक्षक विक्रमसिंह कदम तपास करत आहेत. शेअर बाजारात गुंतवणुकीच्या आमिषाने फसवणुकीचे प्रकार वाढीस लागले आहेत.
गुंतवणुकीच्या आमिषाने सायबर चोरट्यांनी नागरिकांची कोट्यवधी रुपयांची फसवणूक केली आहे. चोरट्यांनी पाठविलेल्या संदेशाकडे दुर्लक्ष करावे, तसेच अनोळखी संदेश, लिंक उघडू नयेत, असे आवाहन पोलिसांकडून करण्यात आले आहे.
