माळढोक वाचवण्यासाठी ‘ग्रासलँड पॉलिसी’ हवी- पाटील

‘‘राज्यात शेवटचे १० ते १५ माळढोक पक्षी उरले असून या पक्ष्यांना वाचवण्यासाठी स्थानिक लोकांच्या सहभागातून माळरानांचे संवर्धन करणे आवश्यक आहे. माळरानांचे शास्त्रीय पद्धतीने संवर्धन करणे शक्य झाले तर स्थानिकांच्या गुरांना चारा तर मिळेलच; पण वन्यजीवांसाठीही ती फायदेशीर ठरतील,’’ असे मत पक्षी अभ्यासक डॉ. प्रमोद पाटील यांनी वसुंधरा आंतरराष्ट्रीय चित्रपट महोत्सवात पत्रकार परिषदेत व्यक्त केले.
पाटील म्हणाले, ‘‘माळढोकांना वाचवण्यासाठी तातडीचे उपाय केले नाहीत तर भारत आणि पाकिस्तानात उरलेले १५० ते २५० माळढोक नामशेष होण्याच्या मार्गावर आहेत. सध्या पशुधन व दुग्धव्यवसायाच्या वाढीसाठी जे प्रयत्न केले जातात त्यांचा माळरानांच्या संवर्धनाशी संबंध नसतो. या दोन गोष्टींची संगती असलेली ‘ग्रासलँड कॉझर्वेशन पॉलिसी’ राबवणे गरजेचे आहे.’’
माळढोक हा सुमारे ४ फूट उंचीचा, पांढऱ्या मानेचा पक्षी आहे. राज्यात सोलापूर, अहमदनगर, चंद्रपूर, वरोरा, नागपूर, नाशिक आणि ओझर येथे तो आढळतो. महाराष्ट्राव्यतिरिक्त राजस्थान, गुजरात, कर्नाटक आणि आंध्र प्रदेश या राज्यांतही हा पक्षी सापडत असून मध्य प्रदेशमधून तो नामशेष झाला आहे. राजस्थानमार्गे हा पक्षी पाकिस्तानात जातो. मात्र तेथे त्याची शिकार होण्याचे प्रमाण अधिक असल्याची माहिती पाटील यांनी दिली.