पुणे : संततधार पावसाने कोंढवा गावठाण येथे एका वाड्याची भिंत कोसळल्याची घटना गुरुवारी घडली. अग्निशमन दलाच्या जवानांनी ११ रहिवाशांना सुखरूप बाहेर काढले. तर, शहरात दहा ठिकाणी झाडे पडल्याच्या घटनांची नोंद करण्यात आली. गेल्या आठवड्याभरातील पावसामुळे कोंढवा गावठाण येथील दत्त मंदिराजवळील एका रिकाम्या वाड्याची भिंत कोसळली. वाड्याची भिंत शेजारच्या घरावर पडल्याने या घरातील ११ रहिवासी अडकले होते. अग्निशमन दलाच्या जवानांनी त्यांना सुखरूप बाहेर काढले. त्यामुळे सुदैवाने कोणीही जखमी झाले नाही. शहरामध्ये गुरुवारी दिवसभरात दहा ठिकाणी झाडे पडल्याच्या घटनांची नोंद अग्निमशन दलाकडे झाली आहे. दीनानाथ मंगेशकर रुग्णालयाच्या आवारामध्ये झाड पडल्याची घटना सायंकाळी घडली. वाकडेवाडी येथील इराणी वस्ती, वानवडी येथील आझादनगर, औंध येथील परिहार चौक, एरंडवणा येथील प्राप्तीकर गल्ली, औंध येथील शेवाळे हॉस्पिटल, भवानी पेठेतील जुना मोटार स्टँड, सातवनगर येथील हांडेवाडी रस्ता आणि कात्रज येथील भाजी मंडई परिसरात झाड पडल्याच्या घटना घडल्या.