पुण्यात वानवडीतील लष्करी वैद्यकीय महाविद्यालयाच्या आवारात तरुणाची आत्महत्या

तरुणाने आत्महत्या करण्यापूर्वी आई-वडिलांना समाजमाध्यमातून चिठ्ठी पाठविली. त्याने समाज माध्यमातील स्टेटसवर चिठ्ठी ठेवली होती. गेल्या वर्षभरापासून तो नैराश्यात होता. त्याच्यावर उपचार सुरू होतो, अशी माहिती त्याच्याबरोबर असलेल्या सहकाऱ्यांनी दिली. या घटनेची माहिती पोलिसांनी तरुणाच्या आई-वडिलांना दिली.तरुणाने आई-वडिलांना चिठ्ठी पाठविल्यानंतर त्यांनी त्वरित पुणे पोलिसांच्या नियंत्रण कक्षाला या घटनेची माहिती दिली. पोलिसांना ही माहिती मिळाली. मात्र, तोपर्यंत त्याने आत्महत्या केली होती, अशी माहिती वानवडी पोलीस ठाण्याचे वरिष्ठ पोलीस निरीक्षक सत्यजित आदमाने यांनी दिली.

या तरुणाने सोमवारी पहाटे वसतिगृहातील प्रसाधनगृहात चाकूने भोसकून घेऊन आत्महत्या केल्याचे उघडकीस आले. पोलिसांनी घटनास्थळी भेट दिली, तेव्हा तो प्रसाधनगृहात रक्ताच्या थारोळ्यात पडला होता. पोलिसांनी एएफएमसीतील वैद्यकीय तज्ज्ञांना ही माहिती दिली. उपचारांपूर्वीच त्याचा मृत्यू झाला होता. परिमंडळ पाचचे पोलीस उपायुक्त डाॅ. राजकुमार शिंदे, सहायक आयुक्त धन्यकुमार गाेडसे, वरिष्ठ पोलीस निरीक्षक सत्यजित आदमाने यांनी घटनास्थळी भेट दिली.

‘ऑनलाइन’ चाकू खरेदी

अभ्यासाचा ताण सहन न झाल्याने तरुण नैराश्यात होता. नैराश्यातून त्याने टोकाचे पाऊल उचलण्याचा निर्णय घेतल्याची शक्यता व्यक्त करण्यात येत आहे. प्राथमिक चौकशीत त्याने ऑनलाइन पद्धतीने चाकू खरेदी केला होता, अशी माहिती मिळाली आहे. वानवडी पोलिसांकडून या प्रकरणाचा तपास करण्यात येत आहे.