उलटा चष्मा : मुहूर्तावर लूट..

नंतरचा एक तास ३३ मिनिटे व चार सेकंदाचा काळ अनुकूल. तेवढय़ा वेळात दरोडा टाकून व्हायला हवा. आता तुमची शस्त्रे दाखवा.’’ हे ऐकताच सर्वानी कपडय़ात दडवलेले पिस्तूल, चाकू, सुरे बाहेर काढले. ज्योतिषांनी मंत्रपुष्पांजली म्हणत त्यांची पूजा केली. ‘‘आमचे शास्त्र खुनाला परवानगी देत नाही, उलट खून कसा टाळता येईल यावर उपाय सांगते. त्यामुळे घरात कुणी असेलच तर मारहाणीवरच निभावून न्या. पिस्तुलाचा वापर शक्यतो टाळा. रोख रक्कम व सोने लुटल्यावर ते पोतडीत भरताना हा अंगारा त्यावर टाका. त्यामुळे ऐवजाचे वजन कमी झाल्याचा भास तुम्हाला सतत होईल. लूट सुरू करण्याआधी मी तुम्हाला देणार असलेले मंतरलेले गंध कपाळावर लावा. दुश्मन म्हणजेच पोलिसांना रोखण्याची ताकद त्यात आहे. कामगिरी फत्ते झाल्यावर शहराबाहेर पडताना गोविंदबागेचा रस्ता धरू नका. आजकाल तिथे रात्रभर खलबते सुरू असतात व बंदोबस्तही मोठा असतो. त्यामुळे वेगळय़ा वाटेने पसार व्हा.’’ हे ऐकून त्या पाचातला एक म्हणाला, ‘‘तुमची दक्षिणा किती? पोलीस पकडणार नाही याची गॅरंटी काय?’’ हे ऐकताच ज्योतिषी हसले. ‘‘मी एकूण लुटीच्या दहा टक्के घेतो आणि गॅरंटीचे म्हणाल तर सत्तेच्या प्रोत्साहनामुळे २०१४ पासून आमचे शास्त्र बरेच अचूक झालेले.’’ हे ऐकताच सर्व सुटकेचा नि:श्वास टाकत बाहेर पडले. तीन महिन्यांनंतर या सर्वाना पोलिसांनी अटक केली व कोठडीत डांबले. त्यांची मस्तपैकी धुलाई केल्यावर मुहूर्त पाहून दरोडय़ाचा उलगडा झाल्याने पोलीस चक्रावले. त्यातल्या एका चौकस अधिकाऱ्याने ज्योतिषाला बाजूला घेत विचारले, ‘‘तुझा मुहूर्त चुकला कसा ते सांग?’’ त्यावर तो म्हणाला, ‘‘सध्या बारामतीवर शनी व मंगळाची अनिष्ट युती झालेली आहे. त्यामुळे माझा मुहूर्त तर चुकलाच, पण पुतण्याचाही चुकला म्हणून त्यांना सर्वोच्च पद हुलकावणी देत आहे.’’ हे ऐकून पोलिसांनी ज्योतिषाला बदड बदड बदडले.