उलटा चष्मा: कलंकशोभा!

वरिष्ठांच्या आशीर्वादाच्या बळावर राजकीय घरफोडीचे गुन्हे करण्यात पारंगत झालेल्या व्यक्तीला सुद्धा हा आजार झाल्याचे अलीकडे निदर्शनास आले आहे. बूमधाऱ्यांसमोर सातत्याने ज्ञान पाजळण्याची सवय जडलेल्या व्यक्तीच्या शरीरात या आजाराचे विषाणू अतिशय वेगाने पसरतात असेही एका पाहणीत आढळून आले आहे. सतत चप्पल, जोडे मारण्याच्या बाता करणे, कसे फिरता ते बघू अशी धमकी देणे, वारंवार बाप काढणे, अवलादीचा उल्लेख करणे, टोमणे मारत मारत बोलणे अशी लक्षणे वारंवार दिसू लागल्यास संबंधित व्यक्तीच्या शरीरात हा कावीळ हळूहळू जम बसवत आहे असे समजण्यास हरकत नाही. वडिलांच्या विचारधारेला खुंटीवर टांगून असंगाशी संग करणे, भलत्यांच्या पंक्तीत बसणे, भ्रष्ट व्यक्तीला मानाचे स्थान देत एकाच ताटात जेवणे, महापुरुषांची नावे घेत समोरच्याला वारंवार डिवचणे ही सुद्धा या आजाराची प्राथमिक लक्षणे असून त्याची वारंवारिता वाढत जाताना दिसली की तो कावीळग्रस्त झाला असे समजावे.

एकमेकांना कलंकित ठरवण्याच्या नादात नेहमीच्या कावीळग्रस्ताप्रमाणेच यांचीही जेवणावरची वासना उडते. आरोप करताना घसा सुकू नये म्हणून पाण्याचा एखादा घोट घेतला तरी अशांना ऊर्जा मिळते. या आजाराचे दीर्घकालीन परिणाम काय यावर ते विचारही करत नाहीत. सातत्याने आरोप-प्रत्यारोपाच्या ध्यासाने पछाडलेले हे रुग्ण सतत वाढत जाणे हा राज्याच्या राजकीय आरोग्यासाठी चिंतेचा विषय झालेला आहे. आपापले पक्ष मोठे करण्याऐवजी इतरांचे पक्ष लहान करण्याच्या प्रयत्नात आपलीच उंची कमी होत आहे हेही अशा रोग्यांच्या लक्षात येत नाही. त्यामुळे या आजाराचे स्वरूप दिवसेंदिवस गंभीर होत चालले असून त्यावर अजूनतरी एकाही राजकीय संशोधकाला लस सापडलेली नाही. २०२४ पर्यंत ती सापडण्याची शक्यतासुद्धा नाही. तेव्हा जनेतेने व राजकारणात करिअर घडवू पाहणाऱ्या तरुणांनी अशा रोग्यांपासून सावध राहावे आणि कलंकशोभा टाळावी, अशी विनंती करण्यात येत आहे.

जनहितार्थ प्रसृत , राजकीय आरोग्य विभाग