लोकमानस : भाजप शिंदे यांचे पुढे काय करणार?

भाजपला सेनेत फूट कधीपासूनच पाडायची होती. कै. प्रमोद महाजन म्हणत, भाजपला महाराष्ट्रात रोखणारे दोनच पक्ष आहेत, एक शेतकरी संघटना व दुसरी शिवसेना. शेतकरी संघटनेत फूट पाडून झाली, आता सेनेत पडत आहे. यामध्ये नुसता सत्ताबदल होणार नाही, तर मराठी माणसांचा आधार असलेला पक्ष पद्धतशीरपणे संपवला जात आहे.

– प्रमोद  प. जोशी, ठाणे पश्चिम

मध्य प्रदेश, गोवा, कर्नाटक.. आता महाराष्ट्र

‘आघाडी सरकार संकटात’ (२२ जून), ‘पदत्यागाची तयारी’ (२३ जून) या व अन्य बातम्या वाचल्या. शेवटी ‘राजकारणात कुणीही कोणाचा कायमचा मित्र किंवा शत्रू नसतो. कायम असतो तो फक्त आणि फक्त आपला स्वार्थ’ हे या घटनाक्रमाने सिद्ध झाले. देशात आधीपासूनच असल्या उलथापालथी चालू आहेत, त्यामुळे यात काही आश्चर्य वाटत नाही. तत्त्व, एकनिष्ठा, समर्पण, जनहित याला काही अर्थच राहिलेला नाही. आपल्याच माणसांवर इतका अविश्वास की त्यांना दूर कुठे तरी हॉटेल, फार्म हाऊसवर कोंडून ठेवले जाते. अशा कारवाईला कोणीही आक्षेपार्ह समजत नाहीत. मध्य प्रदेश, गोवा, कर्नाटक या राज्यांसारखे आता महाराष्ट्रातही सत्तापरिवर्तन होणार! या त्सुनामीत आणखी किती जणांची वाट लागणार हे येत्या काळात समजेलच.

– सुरेश आपटे, पुणे

भ्रष्टाचार, मुस्लीम-तुष्टीकरणामुळे सरकार जावेच

‘सत्ताकारणाची ‘बद’सुरत’ हे संपादकीय वाचकांचा बुद्धिभ्रम करणारे आहे. २०१९ च्या विधानसभा निवडणुकीत नरेंद्र मोदींच्या पाठिंब्यावर ५५ आमदार निवडून येताच, जे शिवसेनेला स्वत:च्या ताकदीवर निवडून आणणे शक्य नव्हते, मतदारांचा विश्वासघात करून निवडणूक सभेत ज्यांच्याविरुद्ध प्रचार केला त्यांच्याबरोबर सत्ता स्थापन केली होती.  ईडीचा ससेमिरा लागला यामागे काही तरी कारण असणारच ना? पण त्याचे राजकारण करण्यात येत आहे. एकनाथ शिंदे यांनी बंडखोरी करताच शिवसेनेतील असंतुष्ट आमदारांना आपली नाराजी व्यक्त करण्याची संधी मिळाली. ज्या आमदारांच्या नाराजीकडे अडीच वर्षे उद्धव ठाकरे यांनी दुर्लक्ष केले, त्यांना बुधवारच्या भाषणातून भावनिक साद घालून त्यांचे ‘इमोशनल ब्लॅकमेलिंग’ करण्यात आले.

खरे तर गेल्या अडीच वर्षांत आपल्या राज्यात भ्रष्टाचाराने थैमान घातले आहे, तसेच हिंदूत्वाचा आव आणून मुस्लिमांचे तुष्टीकरण करण्यात येत असल्याचे दिसत आहे. त्यामुळे हे मविआ सरकार जाणेच इष्ट आहे.

– रमेश नारायण वेदक, चेंबूर (मुंबई)

चुकीच्या मूल्यांची पाठराखणही घातकच

तत्त्व, मूल्य, सामान्य माणसाच्या जगण्यामरण्याचे प्रश्न बासनात गुंडाळून सत्ता मिळवण्यासाठी सर्वच पक्ष कसे घायकुतीला आले आहेत याचे विदारक दर्शन अस्वस्थ करणारे आहे. बंडखोर नेते एकनाथ शिंदे आणि हतबल झालेले उद्धव ठाकरे या दोघांनीही भाजपच्या राजकारणाला प्रत्युत्तर म्हणून हिंदूत्वाचा जो गजर सुरू केला आहे तो अनाकलनीय आहे. जणू काही ‘हिंदूत्व’ हाच महाराष्ट्र आणि देशातील जनतेसमोरचा एकमेव प्रश्न आहे! देशातील सर्वाधिक पुरोगामी राज्य असे बिरुद असलेल्या महाराष्ट्राची ही वैचारिक अवनती अस्वस्थ करणारी आहे. समाजाचे वैचारिक नेतृत्व करणारा मध्यमवर्ग हिंदूत्वाच्या या फसव्या लाटेत वाहून जात आपले कर्तव्य विसरत चालला आहे, हेही यानिमित्ताने स्पष्ट झाले आहे.

द्वेषमूलक हिंदूत्व जनमानसात रुजवण्यासाठी भाजपने गेली तीन दशके जी मेहनत घेतली त्याची विषारी फळे आता सगळे आनंदाने मिटक्या मारत खात आहेत! हे दृश्य महाराष्ट्रात समतेची, सहिष्णुतेची बीजे रोवणाऱ्या संतांचा, समाजधुरीणांचा अपमान आहे असे कोणाला वाटत नाही काय?

शाश्वत मूल्यांना तिलांजली देणे जितके घातक तितकेच चुकीच्या मूल्यांचा उदोउदो करणे हेही घातकच आहे. महाराष्ट्राचे सध्याचे राजकारण या दोन्ही घातक गोष्टी करते आहे.

– राजश्री बिराजदार,  दौंड (जि. पुणे)

सत्ताकांक्षा उघडच, पण खर्च कोण करते?

गेले दोन दिवसरात्र महाराष्ट्राच्या सत्तेसाठी सुरू असलेली साठमारी पाहता, आदिम टोळीयुद्ध आधुनिक तंत्राने लढले जात असल्याचे दिसून आले. परकीयांपेक्षा स्वकीय अधिक सुलभतेने एखाद्या नेत्याला दूर करू शकतात हे पुन्हा एकदा सिद्ध झाले. यातूनही उरलेली एक शंका : दोन-दोन परराज्यांतील रिसॉर्ट, चार्टर्ड विमान यांचा खर्च वैयक्तिक की पक्षाच्या खात्यातून करता येतो? आणि त्याला आयकरातून वजावट वगैरे मिळण्याची तरतूद आहे काय?

– गायत्री साळवणकर, कोल्हापूर</strong>