झगडणाऱ्या संघांना सावरण्याची संधी

पाकिस्तान आणि ऑस्ट्रेलिया लढतीत दोघांनाही विजय आवश्यक
ऑस्ट्रेलिया आणि पाकिस्तान यांच्यात शुक्रवारी मोहालीत होणाऱ्या लढतीमध्ये विजयाची आवश्यकता दोन्ही संघांना आहे. मात्र उपांत्य फेरीचा मार्ग ऑस्ट्रेलियाकरिता अधिक सोपा आहे. पाकिस्तानचा संघ आतापर्यंत या स्पध्रेत झगडताना आढळत असला तरी त्यांना कमी लेखण्याची चूक ऑस्ट्रेलियाने मुळीच करता कामा नये.
तीन सामन्यांपैकी दोन पराभव पत्करणाऱ्या पाकिस्तानच्या उपांत्य फेरीच्या आशा मावळल्यातच जमा आहेत. पाकिस्तानचा संघ ज्या पद्धतीने खेळत आहे, ते पाहता उपांत्य फेरीत पोहोचण्यास ते लायक नाहीत, अशी ग्वाही प्रशिक्षक वकार युनूस यांनीच दिली आहे.
ऑस्ट्रेलियाचीसुद्धा कामगिरी तशी अपेक्षेप्रमाणे झालेली नाही. न्यूझीलंडविरुद्ध पराभव पत्करल्यानंतर बांगलादेशविरुद्ध रडतखडत विजय त्यांना मिळवता आला होता. गुणतालिकेतील दुसऱ्या गटात न्यूझीलंडने उपांत्य फेरीत आधीच स्थान निश्चित केलेले आहे. त्यामुळे ऑस्ट्रेलियाने पाकिस्तानला हरवले तर त्यांच्या उपांत्य फेरीच्या आशा जिवंत राहतील. मग रविवारी होणारा भारताविरुद्धचा सामना हा दोन्ही संघांसाठी जणू उपांत्यपूर्व फेरीचाच सामना असेल.
‘‘धोकादायक संघ म्हणून ओळखल्या जाणाऱ्या पाकिस्तानला कमी लेखण्याची चूक आम्ही अजिबात करणार नाही,’’ असे ऑस्ट्रेलियाचा यष्टिरक्षक पीटर नेव्हिल म्हणाला. बांगलादेशविरुद्धच्या सामन्यात संघ व्यवस्थापनाने फॉर्मात असलेल्या उस्मान ख्वाजाला शेन वॉटसनसोबत सलामीला पाठवण्याची चाल रचली होती. तर बेधडक फटकेबाजी करणाऱ्या डेव्हिड वॉर्नरला चौथ्या स्थानावर फलंदाजीला पाठवण्यात आले होते. ख्वाजाने आघाडीच्या जबाबदारीला न्याय दिला होता, पण वॉर्नर मात्र आपली भूमिका चोखपणे पार पाडू शकला नव्हता. मात्र लेग-स्पिनर अ‍ॅडम झम्पाने तीन बळी घेण्याचा पराक्रम दाखवला होता.
पाकिस्तानचे फलंदाज महत्त्वाच्या सामन्यांत कामगिरी दाखवण्यात अपयशी ठरत आहेत, अशा प्रकारे युनूस उणिवा दाखवत आहेत. याशिवाय विश्वचषकानंतर शाहिद आफ्रिदीला कर्णधारपदावरून हटवण्यात येणार असल्याचे पीसीबीने जाहीर केले आहे.