Apple ने १२ सप्टेंबर रोजी कॅलिफोर्निया येथे झालेल्या इव्हेंटमध्ये आपली आयफोन १५ सिरीज लॉन्च केली आहे. काही दिवसांपूर्वी त्याचे प्री-बुकिंग सुरु झाले होते. आयफोन १५ सिरीजमध्ये आयफोन १५ , आयफोन १५ प्लस, आयफोन १५ प्रो आणि आयफोन १५ प्रो मॅक्स या चार मॉडेल्सचा समावेश आहे.आजपासून भारतात आयफोन १५ सिरीजची विक्री सुरू झाली आहे. आयफोन १५ सिरीजमधील मॉडेल्सची खरेदी करण्यासाठी इच्छुक खरेदीदारांनी मुंबई आणि दिल्लीमधील अधिकृत रिटेल स्टोअर्समध्ये गर्दी केली आहे.
मुंबईतील बांद्रा कुर्ला कॉम्प्लेक्स येथे असणाऱ्या अ‍ॅपल स्टोअरमध्ये लॉन्च झालेले नवीन आयफोन खरेदी करण्यासाठी ग्राहकांची मोठी गर्दी झालेली आहे. ”मी काल दुपारी ३ वाजल्यापासून येथे आलो आहे. भारतातील पहिल्या अ‍ॅपल स्टोअरमध्ये पहिला नवीन आयफोन घेण्यासाठी मी १७ तास रांगेत प्रतीक्षा केली असे अहमदाबादवरून आलेल्या एका ग्राहकाने ANI ला सांगितले. ” मुंबईतील स्टोअरबाहेर देशभरातील ग्राहक नवीन आयफोन खरेदीसाठी रांगेत उभे आहेत.
बंगळुरूमधील ग्राहक विवेक यांनी सांगितले की, मी नवीन आयफोन घेणार म्हणून मला आनंद झाला आहे. अहमदाबाद येथील एका ग्राहकाने सांगितले की मी सकाळी ५ वाजल्यापासून स्टोअरच्या बाहेर उभा आहे. तसेच तो पुढे म्हणाला की मी स्टोअरच्या ओपनिंगवेळी देखील आलो होतो आणि मला सीईओ टीम कूक यांना भेटण्याची संधी मिळाली होती.
अशीच गर्दी दिल्लीमधील साकेत येथे असणाऱ्या Apple स्टोअरबाहेर पाहायला मिळाली. आयफोनचे चाहते सकाळपासूनच स्टोअरबाहेर वाट बघत उभे आहेत. ”मी सकाळी ४ वाजल्यापासून रांगेत उभा होतो मग मी फोन खरेदी केला. माझ्याकडे नेहमी टॉप फोन्स असतात. माझ्याकडे आयफोन १३ प्रो मॅक्स आणि आयफोन १४ प्रो मॅक्स आहे. आयफोन १५ सिरीज लॉन्च झाल्यानंतर मला आयफोन 15 प्रो मॅक्स घ्यायचा होता, तो ही सर्वांच्या आधी.”असे आयफोनच्या एका उत्साही चाहत्याने सांगितले.
काय आहे खास ?
आयफोन १५ आणि आयफोन १५ प्लसमध्ये A16 बायोनिक चिपसेटचा सपोर्ट देण्यात आला आहे. तसेच यात ४८ मेगापिक्सलचा प्रायमरी कॅमेरा देण्यात आला आहे. तर आयफोन १५ प्रो मॉडेलमध्ये सर्वात शक्तिशाली अशा A17बायोनिक चिपसेटचा सपोर्ट देण्यात आला आहे. कंपनीने आयफोन १५ प्रो आणि प्रो मॅक्स देखील सादर केले आहेत. कंपनीने आयफोन १५ प्रो मॉडेल्समध्ये अ‍ॅक्शन बटण दिले आहे. ज्याचे मदतीने वापरकर्त्यांना अनेक कामे करता येणार आहेत. कंपनीने आयफोन १५ व १५ प्लस पाठोपाठ आयफोन १५ प्रो सिरीज लॉन्च केली आहे. यामध्ये टायटॅनियम बॉडीचा वापर करण्यात आला आहे. बेजल देखील कमी करण्यात आले आहे. तुम्ही आयफोन १५ प्रो आणि १५ प्रो मॅक्स अनुक्रमे ६.१ आणि ६.७ इंचाच्या डिस्प्लेसह खरेही करू शकता. आयफोन १५ च्या डिस्प्लेचा आकार ६.१ इंच आणि आयफोन १५ प्लस डिस्प्लेचा आकार ६.७ इंच असणार आहे. दोन्ही मॉडेल्सना सिरॅमिक ग्लासचे संरक्षण देण्यात आले आहे.आयफोन १५ ची किंमत ७९,९०० रुपयांपासून सुरु होते. आयफोन १५ प्लसची किंमत ८९,९०० रुपये तर आयफोन १५प्रो ची किंमत १,३९,९०० रुपये आणि आयफोन १५ प्रो मॅक्सची किंमत १,५९,९०० रुपयांपासून सुरु होते.
